ShQO-da sý tasqyny júrýi múmkin 108 eldi meken anyqtaldy
ShQO TJD baspasóz qyzmetiniń málimetine súıensek, oblystyń taý ózenderindegi qar mólsheri ortasha jyldyq normadan 20-50%-ǵa joǵary. Sondaı-aq Shemonaıha, Shar qalalarynda jáne Shalabaı, Semııarka, Dmıtrıevka, Katonqaraǵaı, Kókpekti, Samar aýyldarynda qar jamylǵysyndaǵy ylǵal qory normadan 1,5-2 esege artyq.
Qazirde oblystyń 3 qalasy men 15 aýdanynda sý tasqyny júrýi múmkin 108 eldi meken bar. Aldyn alý sharalarynyń nátıjesinde 26-synda tasqyn qaýpi joıylsa, 52-sinde barynsha azaıtyldy. 30 eldi mekende sý tasqyny aýa raıy nasharlaǵan jaǵdaıda ǵana bolýy múmkin.
«Búgingi tańda oblysta 246,7 myń tekshe metr qar shyǵaryldy. Turǵyn úılerdi erigen sýdan qorǵaý úshin ydys-qap pen ınertti materıaldar daıyndalǵan. Jaǵalaýdy bekitý jumystary júrgizilip, 118 shaqyrym aryq tazartyldy», - delingen vedomstvo málimetinde.
