ShQO-da sý tasqyny kezeńine daıyndyq kúsheıdi

ÓSKEMEN. QazAqparat – Shyǵys Qazaqstan oblysynda kóktemgi sý tasqyny kezeńine daıyndyq jumystary jalǵasyp jatyr, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńirde sý tasqyny kezeńine daıyndyq júrgizý boıynsha arnaıy jumys toptary qurylǵan. Olardyń quramyna jergilikti atqarýshy organdar, qutqarýshylar, «Sý resýrstaryn paıdalaný men qorǵaýdy retteý jónindegi Ertis basseındik ınspektsııasy» RMM mamandary kirip otyr.

«Top músheleri Shyǵys Qazaqstannyń barlyq aýdandaryna baryp, qar shyǵarý jáne sý ótkizgish qubyrlar men kanaldardy tazartý jónindegi jumystardy baqylaýda. Qajetti materıaldyq-tehnıkalyq quraldardy daıyndaý barysyn da tekserip, halyqpen júrgiziletin profılaktıkalyq jumystarǵa taldaý júrgizýde. Sondaı-aq kásipkerlermen azyq-túlik jáne dári-dármek jetkizýge, tótenshe jaǵdaıda adamdardy ornalastyrýǵa, kólik qyzmetterin kórsetýge kelisim-sharttar jasalǵanyn tekserip jatyr», - delingen aqparatta.

Oblys boıynsha jergilikti atqarýshy organdar jalpy uzyndyǵy 221 shaqyrym 1057 sý ótkizý qurylystaryn, 217 kanal men aryqty tazartty. Qys bastalǵaly beri Shyǵys Qazaqstannyń qala, aýdan kóshelerinen 243 myń tekshe metr qar shyǵarylǵan.

Budan bólek, sý tasqyny kezeńine qum salynǵan 42 myń dana qap, 1874 tonna ınertti materıal, 237 tonna janar-jaǵarmaı daıyndaldy. TJD qyzmetkerleri sý tasqyny kezeńi jaqyndaǵan saıyn daıyndyq jumystaryn kúsheıtýde.