ShQO-da sý tasqyny qaýpi bar ýchaskelerge tikushaqpen barlaý júrgizildi
ShQO Tótenshe jaǵdaılar departamenti baspasóz qyzmetiniń málimetine súıensek, oblys ákiminiń orynbasary Erjan Nurbaevtyń tóraǵalyǵymen sý tasqyny qaýpi bar ýchaskelerge «MI-8» tikushaǵymen barlaý júrgizildi. Sonyń barysynda Rıdder qalasy, Altaı, Glýbokoe, Katonqaraǵaı, Kúrshim, Samar, Ulan aýdandaryndaǵy ózen arnalary, taýly jáne jazyq jerler, gıdrotehnıkalyq qurylystar tekserildi.
«Altaı aýdanyndaǵy Buqtyrma ózeniniń sý tasqyny qaýpi bar ýchaskelerinde muzdy usaqtaý úshin jarylys jumystaryn júrgizý barysy tekserildi. Jazyq jerlerde, Kúrshim aýdanynda qar 60-70%-ǵa, Samar jáne Ulan aýdandarynda 20-40%-ǵa erigen. Qalǵan aýmaqtarda da qar tez erı bastady. Óńir boıynsha sý tasqyny qaýpi joǵary jerler únemi baqylaýda», - deıdi Erjan Nurbaev.
Oblystyq TJD bastyǵynyń orynbasary Arman Toqanovtyń aıtýynsha, zerttelgen aýmaqtarda ózenderdiń arnalarynan asýy baıqalǵan joq. Buqtyrma, Úlbi ózenderiniń arnalary men sý qoımalarynyń betterinde áli muz qatyp tur.
«Qaljyr ózeniniń arnasy muzdan endi ǵana ashyla bastady. Tekserilgen gıdrotehnıkalyq qurylystarda jaǵdaı turaqty. Sýǵa tolý kórsetkishi – 30-60% quraıdy. Oblystyń barlyq taýly aýmaǵynda qar jamylǵysy saqtalýda», - deıdi ol.
Aımaqta sý tasqyny jaǵdaıy qıyndap ketse jergilikti atqarýshy organdar men azamattyq qorǵaý qyzmetteriniń kúshteri jyldam áreket etýge ázir. Barlyǵy 1 719 adam, 756 tehnıka, 83 júzý quraly jáne 224 motopompa daıyn tur. Sondaı-aq qajet bolǵan jaǵdaıda QR TJM № 68303 áskerı bóliminiń kúshteri men quraldary tartylady.