ShQO-da sý tasqyndarynyń aldyn alýǵa 2 mlrd teńge kerek
ShYǴYS QAZAQSTAN OBLYSY. QazAqparat - Shyǵys Qazaqstan oblysynda kóktemgi sý tasqyndarynyń aldyn alý úshin 2 mıllıard teńgeden astam qarjy kerek. Bul týraly óńir ákimdiginiń resmı saıtynda málim etildi, dep habarlaıdy QazAqparat.
«Bıylǵy kóktemde Shyǵys Qazaqstan oblysy tasqyn sýdan aıtarlyqtaı zardap shekti. Tabıǵattyń tosyn minezi sheneýnikterge kezekti sabaq bergendeı. Sondyqtan oqys oqıǵanyń aldyn alyp, tasqynǵa tosqaýyl qoıý maqsatynda aımaqtyń arnaıy Jol kartasy ázirlendi. Al 2020 jylǵa deıingi jospary belgilengen isterdiń birqatary bastalyp ta ketti», - delingen ákimdik aqparatynda.
Atap ótilgendeı, arnaıy jumys toby 1-25 maýsym aralyǵynda qalalar men aýdandarǵa at basyn tiredi. Qaýip deńgeıi joǵary ózender men toǵandardyń, sý qoımalary men gıdrotehnıkalyq ǵımarattardyń jaǵdaıyn zerttep qaıtty. Nátıjesinde, «osal oryndar» tizimi jasaldy.
ShQO ákiminiń orynbasary Serik Aqtanovtyń aıtýynsha, asa qaýipti aımaqtar qataryna Zyrıan, Shemonaıha, Katonqaraǵaı, Kókpekti, Ulan Aıagóz aýdandary, sondaı-aq Rıdder, Semeı jáne Óskemen qalalary kirgen. Osy rette Jol kartasy boıynsha atalmysh ýchaskelerde úsh jyldyń ishinde 81 is-shara ótkizý josparlanyp otyr.
«Gıdrotehnıkalyq ǵımarattar jóndelinip, qaıta qalpyna keltiriledi. Túbin tereńdetý jáne jaǵajaıdy bekitý jumystary júrgiziledi. Búginde jınalǵan laıdyń kólemi anyqtaldy, sonymen qatar úıindi kúıindegi qorǵanys dambalary jasalady. Osy josparly isti júzege asyrý úshin oblystyq bıýdjetten 2 mıllıardtan astam teńge qarastyrý kerek», - dedi Serik Aqtanov.
Budan bólek, Jol kartasy aıasynda erigen jáne jańbyr sýynyń aǵyp ótýi úshin qalalar men aýdandardyń ákimderine eldi mekenderdiń sý tartý syzbasyn jasaý jáne bekitý tapsyryldy. Sondaı-aq, ózen arnalarynda muzdy jarý jumystaryn erte bastaý jospary jasalady. Ásirese, Ertis, Úbi jáne Buqtyrma ózenderi basty nazarda bolmaq.
Esterińizge sala keteıik, Shyǵysta bıylǵy kóktemde 6 qala men 12 aýdan qyzyl sýdan, jaýyn-shashyn men erigen qar sýynan zardap shekti. 1,2 myń turǵyn úıge sý kirip, onyń 128-i turýǵa jaramsyz dep tanyldy. Qazirgi tańda qalpyna keltirý, úılerdi jóndeý jumystary aıaqtalyp qaldy.
