ShQO-da sý tasqynynyń aldyn alý úshin ne istelip jatyr

ÓSKEMEN. KAZINFORM – Shyǵys Qazaqstan oblysynda kóktemgi sý tasqynyna daıyndyq jumysy bastalyp ketti.

Óńirde ózen arnalary tazartylyp, bógetter nyǵaıtylyp jatyr. ShQO Tótenshe jaǵdaılar departamentiniń málimetinshe, 2026 jylǵy sý tasqyny kezeńinde qaýipsizdikti qamtamasyz etý úshin barlyq aýdandarda daıyndyq bastalyp ketken.

Máselen, Glýbokoe aýdanyndaǵy Progress aýylynda uzyndyǵy 1,2 shaqyrym bolatyn Glýbochanka ózeniniń arnasy tereńdetilip, sý aǵysyna kedergi keltirgen buta men aǵashtardan tazartyldy. Novo-Ýlbınka aýylyndaǵy shaǵyn Úlbi ózeniniń bógeti kúsheıtilip, Beregovaıa kóshesin sý deńgeıiniń kóterilýinen qorǵaý sharalary qolǵa alyndy.

— Qazirgi ýaqytta eki eldi mekende jumys jalǵasyp jatyr. Bystrýha aýylynda Maloýbınka ózeni mańyndaǵy kópir men jaǵalaýda ornalasqan úılerdi qorǵaý úshin tıisti sharalar jasalyp jatyr. Al Cheremshankada buryn buzylǵan topyraq bógeti qalpyna keltirile bastady. Bul 30-dan astam úıdi sý tasqynynan qorǵaýǵa múmkindik beredi, — dedi Glýbokoe aýdany TJ bólimi bastyǵynyń mindetin atqarýshy Konstantın Borovıkov.

Injenerlik jumystardy erterek júrgizý keler jylǵy kóktemde halyqtyń qaýipsizdigin qamtamasyz etýge kómektespek.

— Ózen arnalary men jaǵalaýlaryn ýaqytyly daıyndaý — eldi mekender men nysandardy qorǵaýdyń asa mańyzdy bóligi. Jalpy óńirde Úlbi, Kishi Úlbi, Buqtyrma, Ulan, Berezka, Qara-Ózek, Naryn, Glýbochanka jáne Qaljyr ózenderiniń arnalary men jaǵalaýdaryn tereńdetý jáne tazartý jumystaryna erekshe kóńil bólingen, — delingen departament aqparatynda.

Eske salsaq, osyǵan deıin sý tasqynyna daıyndyq maqsatynda Batys Qazaqstanda birneshe ózenniń arnasy keńeıtilgeni habarlanǵan.