ShQO-da sý tasqynynyń aldyn alý: 174 kópir qardan tazartyldy
ÓSKEMEN. KAZINFORM – Shyǵys Qazaqstan oblysynda sý tasqynynyń aldyn alý úshin 174 kópir qardan tazartylyp, óńirdegi qala, aýyldardyń kóshelerinen 168,6 myń tekshe metr qar shyǵaryldy.
Oblystyq Tótenshe jaǵdaılar departamenti baspasóz qyzmetiniń málimetine súıensek, sý tasqyny jaǵdaıyna úzdiksiz monıtorıng júrgizilýde. Qazirgi ýaqytta jaǵdaı turaqty.
«Jergilikti atqarýshy organdar uzyndyǵy 181 shaqyrymdy quraıtyn 170 kanal men aryqty, 783 sý ótkizý qurylysyn, 174 kópirdi qardan tazartty. Jalpy óńirdegi qala, aýyldardyń kóshelerinen 168,6 myń tekshe metr qar shyǵaryldy. 1 aqpannan bastap oblys ákiminiń ókimine sáıkes joǵary daıyndyq rejımi jarııalanǵan. Jaǵdaı qıyndasa 2334 adam, 735 tehnıka, 50 júzý quraly men 223 motopompa jedel áreket etý úshin saqadaı saı tur», - delingen aqparatta.
Sý tasqyny saldaryn joıý jáne halyqty evakýatsııalaý úshin TJD-nyń 26 jol talǵamaıtyn tehnıkasy bar. Shyǵys Qazaqstan boıynsha qalalar men aýdandardyń ákimdikteri sý tasqyny bolǵan jaǵdaıda halyqty ýaqytsha ornalastyratyn 153 pýnktti belgiledi. Onda 17 myńnan astam adam sııady.