ShQO-da sý tasqynyna daıyndyq qalaı júrip jatyr

ÓSKEMEN. KAZINFORM – Shyǵys Qazaqstan oblysynda kóktemgi sý tasqyny kezeńine daıyndyq jumystary jalǵasyp jatyr. 

Oblys aýmaǵynda barlyǵy 128 gıdrotehnıkalyq nysan bar. Olardyń barlyǵy turaqty baqylaýǵa alynǵan.

– Sý tasqyny qaýpi joǵary kezeńge daıyndyq aıasynda birqatar ınjenerlik jumys atqaryldy. Atap aıtqanda, ózen arnalary 3,5 shaqyrymǵa tereńdetilip, keńeıtildi. 800 metr qorǵanys bógeti jóndeldi. 2,35 shaqyrym jaǵalaýdy bekitý qurylystary salyndy jáne kúsheıtildi. 5,5 shaqyrym sý burý arnalary jasaldy, - dep habarlady ShQO ákimdiginen. 

Sonymen qatar Altaı, Marqakól, Úlken Naryn, Kúrshim, Shemonaıha, Katonqaraǵaı jáne Glýbokoe aýdandarynda muz keptelisi qaýpi bar 20 ýchaske anyqtalǵan. 

Eldi mekenderdiń ózinde de sý tasqynyna qarsy jumystar jalǵasyp jatyr. Qazirgi ýaqytta aryqtar men kanaldardyń 35%-y tazartylyp, 32% sý ótkizý qurylystary retke keltirildi. Oblys aýmaǵynan barlyǵy 216 myń tekshe metr qar shyǵaryldy. 

Jalpy Shyǵys Qazaqstanda 70 eldi mekende sý tasqyny qaýpi bar. Onda shamamen 3,5 myń turǵyn úı ornalasqan.

Tótenshe jaǵdaılardyń aldyn alý jáne jedel áreket etý úshin kúshter men quraldar toby jasaqtaldy. Olardyń quramynda 3 677 adam, 556 tehnıka, 73 júzý quraly jáne 234 motopompa bar.

Sondaı-aq 13 myń adamdy qabyldaı alatyn 137 ýaqytsha ornalastyrý pýnkti daıyndaldy.

Eske salsaq, osyǵan deıin sý tasqynyna daıyndyq maqsatynda Oljas Bektenovtiń respýblıkalyq jedel shtab otyrysyn ótkizgenin jazǵanbyz.