ShQO-da sý tasqynyn boljaý júıesi ázirlenip jatyr
ÓSKEMEN. KAZINFORM – Shyǵys Qazaqstan oblysynda sý tasqynyn boljaý júıesi ázirlenip jatyr.
Jańa jobanyń maqsaty – óńirdegi sý tasqyny jaǵdaıyn baqylaýdyń tıimdiligin arttyrý. Aýmaqtardy sý basýyna monıtorıng júrgizý men boljaýdy qamtamasyz etý ádisterin qamtıtyn taldamalyq júıe ázirlenbek.
«Sý tasqyny kezeńinde Shyǵys Qazaqstan oblysynyń ózenderinde sý deńgeıi kóterilip, aýyldardy, turǵyn úılerdi sý basý qaýpi týyndaıdy. Sondyqtan aldymyzda maýsymdyq sý tasqynyn boljaýǵa múmkindik beretin júıe ázirleý mindeti turdy. D. Serikbaev atyndaǵy ShQTÝ-da joǵaryda atalǵan jobany qurý úshin ózen gıdravlıkasy men sý basý aımaqtaryn modeldeýdi, zamanaýı geoaqparattyq júıelerdi, qaýipti obektilerdi, ınfraqurylymdy, mekemelerdi, turǵyn úılerdi, relefti jáne meteojaǵdaılardy egjeı-tegjeıli kartografııalyq baılanystyrýdy paıdalanǵan zertteýshiler toby jasaldy. Jumystar jalǵasýda», - deıdi Aqparattyq tehnologııalar salasyndaǵy quzyretter jáne tehnologııalar transferi ortalyǵynyń basshysy Rýslan Chettikbaev.
ShQO TJD tótenshe jaǵdaılardyń aldyn alý basqarmasynyń bastyǵy Arman Naýryzbaevtyń aıtýynsha, JOO ǵalymdarymen ózara is-qımyl týraly memorandýmǵa qol qoıylǵan.
«Bolashaqta táýekelderdi eskere otyryp sý tasqynynyń aldyn alý maqsatyndaǵy sharalardy qabyldaýǵa múmkindik beretin tehnologııany damytyp, belsendi yntymaqtastyq ornatamyz degen senimdemin. Júıeni jaqsartý úshin meteorologııalyq derekterdi iske qosýdy josparlanǵan», - dedi ol.
