ShQO-da sý tasqynyn boljaý úshin gıdrobeketter JI-ge qosylmaq
ÓSKEMEN. KAZINFORM – Shyǵys Qazaqstan oblysynda bıyl barlyq gıdrobeketterdi jasandy ıntellektini qoldana otyryp tolyq avtomattandyrylǵan rejımge kóshirý josparlanyp otyr.
Buǵan deıin derekter jınaý kóbine qolmen ólsheýge táýeldi bolsa, endi úzdiksiz tsıfrlyq baqylaýǵa basymdyq berilmek. Qazir óńirde 26 gıdrobeket jumys istep tur. Bıyl olar avtomatty túrde derekterdi óńdeıtin biryńǵaı júıege biriktiriledi.
– Bıyl gıdrobeketter tolyq avtomattandyrylady. Bul tek sý deńgeıin tirkep qana qoımaı, túrli parametrlerdi dınamıkada keshendi túrde taldaýǵa múmkindik beredi. Osy derekter negizinde jasandy ıntellekt elementteri engizilgen júıe sý tasqyny jaǵdaıyna boljam jasap, yqtımal qaýipter týraly aldyn ala eskertý bere alady, – dep habarlady ShQO ákimdiginen.
Jańa júıe keńeıtilgen derekter jıyntyǵyna negizdelgen. Datchıkter sý aǵysynyń jyldamdyǵyn, sý kólemin, aýa raıy jaǵdaılaryn jáne buǵan deıin ishinara ǵana eskerilgen ózge de kórsetkishterdi tirkeıdi.
Júıeniń basty artyqshylyǵy – jedel áreket etý múmkindigi. Buryn aqparat belgili bir kidirispen tússe, endi ózgerister is júzinde birden tirkeledi. Bul qajetti sheshimderdi jyldam qabyldaýǵa jol ashady.
ShQO Tótenshe jaǵdaılar departamentinde mundaı tehnologııalar tótenshe jaǵdaılardyń aldyn alý júıesin kúsheıtetinin atap ótti.
– Tsıfrlyq sheshimder men avtomattandyrylǵan monıtorıngti paıdalaný – boljamdardyń dáldigin arttyryp, gıdrologııalyq jaǵdaıdaǵy ózgeristerge der kezinde áreket etýge múmkindik beredi, – dep habarlady vedomstvo ókilderi.
Eske salsaq, osyǵan deıin Atyraýda ákimdik tasqyn kezinde apatty dep tanylǵan úılerin buzbaǵan 99 turǵyndy sotqa bergeni habarlanǵan.
