ShQO-da sý men jylýǵa qatysty iri jobalarǵa qosymsha qarjy bólinbek

ÓSKEMEN.KAZINFORM – Shyǵys Qazaqstan oblysynda bıýdjetti qaıta bólýdiń nátıjesinde birqatar mańyzdy ınfraqurylymdyq jobalarǵa qosymsha qarjy quıyldy.

Atap aıtqanda, Rıdder qalasyndaǵy jylý jelileri men jabdyqtarǵa kúrdeli jóndeý jumystaryn júrgizý úshin 850 mln teńgeden astam qarjy bólindi. Bul – óńir boıynsha qarjylandyrylǵan eń iri joba.

Óskemende Leshoz kentindegi sý qubyry jelilerin qaıta jańǵyrtý jumystary jalǵasady. Jobanyń jalpy quny – 1,77 mlrd teńge. Buǵan deıin 772 mln teńge ıgerilse, bıyl 662,6 mln teńge bólindi. Jobany tolyq aıaqtaý úshin taǵy 340,2 mln teńge qajet.

– Basty maqsat – eldi mekenderdi turaqty jylýmen jáne aýyzsýmen qamtamasyz etý. Barlyq joba kezeń-kezeńimen júzege asyrylady, – dep habarlady oblys ákimdiginen.

Sonymen qatar Glýbokoe kentindegi jylý jelilerin qaıta qurýǵa — 250 mln teńge, Samar aýylyndaǵy jelilerdi jóndeýge — 132 mln teńge bólindi.

Aýyldardy sýmen qamtamasyz etý maqsatynda da birqatar jobaǵa qarajat quıyldy. Atap aıtqanda Glýbokoe aýdanyna qarasty Beloýsovka kentindegi magıstraldyq sý júıesin jóndeýge — 100 mln teńge, Berezovka aýylyndaǵy sý qubyry qurylysyn aıaqtaýǵa —44 mln teńge, Shemonaıha aýdanyna qarasty Bolshaıa Rechka aýylynda sý qubyryn salýǵa — 39,5 mln teńge baǵyttaldy.

Eske salsaq, osyǵan deıin qazaqstandyqtarǵa jylý úshin tólengen 1,6 mlrd teńge qaıtarylatyndyǵy habarlanǵan.