ShQO-da stýdentter onlaın rejımde tájirıbeden ótýde
ÓSKEMEN. QazAqparat – Shyǵys Qazaqstan gýmanıtarlyq kolledjiniń stýdentteri kanvass platformasy boıynsha qashyqtan bilim alýda, dep habarlady QazAqparat tilshisi.
Kolledj dırektory Farhad Qurmanovtyń aıtýynsha, ishteı bólimde 1138 stýdent oqıdy.
«Áýelde qashyqtan oqytý júıesine kóshý barysynda birqatar qıyndyq týyndaǵany ras. Alaıda munyń bári ýaqyt óte kele sheshimin tapty. 15 stýdentke bir jyldyq abonementi bar roýterlerdi tegin tarattyq. Olar áleýmettik jaǵynan az qamtylǵan jáne kópbalaly otbasydan shyqqandar jáne jetim balalar», - deıdi ol.
Kolledj dırektorynyń aıtýynsha, budan bólek ınternet jelisi nashar jerde turatyn 19 stýdentke fleshkamen aqparattar berilgen.
«Ustazdar qaýymy qashyqtan oqytý júıesine kóshý barysynda 100-ge jýyq vıdeo sabaq daıyndady. Ony bizdiń kolledjdiń ıýtýb kanalynan kórýge bolady. Sonymen qatar kolledjdiń resmı saıtynda kanvass platformasyna engizilmegen elektrondy kitaptar qoıylǵan. Bul óz kezeginde stýdentterdiń sapaly bilim alýy úshin jasalýda. Al 2-3 kýrs stýdentteri is-tájirıbeden onlaın rejımde ótip jatyr», - dedi Farhad Qurmanov.
