ShQO-da sport zaly men mektepke deıingi shaǵyn ortalyǵy bar jańa mektep ashyldy
ÓSKEMEN. KAZINFORM — Respýblıka kúni qarsańynda Shyǵys Qazaqstan oblysy Kúrshim aýdanynyń Qystaý-Kúrshim aýylynda 50 oqýshyǵa arnalǵan jańa mektep ashyldy. Zamanaýı ǵımarat jarty ǵasyrdan astam ýaqyt paıdalanylyp, apatty jaǵdaıǵa jetken eski mekteptiń ornyna salyndy.
Endi aýyl balalaryna jabdyqtalǵan oqý kabınetteri, zerthanalar, sport zaly jáne mektepke deıingi shaǵyn ortalyq qyzmet kórsetedi.
Burynǵy mektep 1974 jyly salynyp, 1975 jyly paıdalanýǵa berilgen. Uzaq jyldar boıy paıdalanylǵan ǵımarat ábden tozyp, jeke sport zalynyń bolmaýy dene shynyqtyrý sabaqtaryn ótkizý múmkindigin shektegen.
Jańa mektepte bir aýysymda bilim alýǵa qajetti barlyq jaǵdaı jasalǵan. Munda oqý kabınetteri, zerthanalar, akt zaly, ashana jáne kitaphana bar. Ǵımarat ınternet jelisine qosylyp, elektrmen jylytý júıesi ornatylǵan, mektep aýmaǵy abattandyrylǵan.
Saltanatty ashylý rásiminde Shyǵys Qazaqstan oblysynyń ákimi Nurymbet Saqtaǵanov turǵylyqty jerine qaramastan, barlyq balaǵa sapaly bilim alýǵa teń múmkindik jasaýdyń mańyzdylyǵyn atap ótti. Sondaı-aq óńir basshysy mektepke robototehnıka kabınetin jabdyqtaýǵa arnalǵan sertıfıkat tabystady.
Aýyl turǵyndary úshin taǵy bir mańyzdy jańalyq — mektep janynan mektepke deıingi shaǵyn ortalyqtyń ashylýy. Buǵan deıin aýylda balabaqsha bolmaǵan. Qazir shaǵyn ortalyqqa alty bala barady.
Búginde mektepte 26 qyzmetker jumys isteıdi, onyń 13-i — pedagog. Mektep ákimshiliginiń málimetinshe, muǵalimderge degen qajettilik tolyq qamtamasyz etilgen. Mamandardy tartý maqsatynda jergilikti kásiporynnyń qoldaýymen eki páter satyp alynǵan. Sonyń nátıjesinde balalary bar eki otbasy aýylǵa qonys aýdardy. Olardyń qatarynda fızıka jáne tarıh pánderiniń muǵalimderi bar.
Osylaısha, jańa mekteptiń ashylýy balalardyń bilim alý jaǵdaıyn jaqsartyp qana qoımaı, mektepke deıingi tárbıemen qamtýǵa jáne aýylǵa bilikti mamandar tartýǵa múmkindik berdi. Qystaý-Kúrshim turǵyndary úshin bul — aýyldyń áleýmettik ınfraqurylymyn damytýǵa jáne halyqtyń ómir súrý sapasyn arttyrýǵa baǵyttalǵan mańyzdy qadam.
