ShQO-da sottalǵan adam Almatyda 4 jyl buryn qarý-jaraq jasyrylǵan jerdi aıtty
ÓSKEMEN. KAZINFORM – Almaty qalasynda 2022 jylǵy Qańtar oqıǵasy kezinde jasyrylǵan bolýy múmkin qarý-jaraq qoımasy anyqtaldy.
Quqyq qorǵaý organdary jasyryn oryndy Shyǵys Qazaqstan oblysynda jazasyn ótep jatqan sottalǵan azamatpen júrgizilgen jedel jumys barysynda anyqtaǵan.
Qarý-jaraq jasyrylǵan oryn Almatynyń Naýryzbaı aýdanynda tabyldy. Operatsııany Іshki ister mınıstrligi Qylmystyq-atqarý júıesi komıtetine qarasty №22 mekemeniń jedel bólim qyzmetkerleri Shyǵys Qazaqstan oblysy boıynsha mamandandyrylǵan prokýratýra jáne Ulttyq qaýipsizdik komıteti departamentiniń 5-basqarmasymen birlesip júrgizgen.
Oqıǵa ornyn tekserý barysynda jasyryn qoımadan tegis uńǵyly ańshy myltyǵy men oq-dáriler tárkilendi. Qazirgi ýaqytta sot-ballıstıkalyq saraptama taǵaıyndaldy. Quqyq qorǵaý organdary qarýdyń shyǵý tegin jáne ony jasyrǵan adamdardy anyqtaý jumystaryn júrgizip jatyr.
ShQO boıynsha QAJ departamentiniń resmı ókili Saltanat Ojıkanovanyń aıtýynsha, arada birneshe jyl ótse de jedel-izdestirý jumystary naqty nátıje berdi.
– Sottalǵandarmen jumys barysynda alynǵan málimetter ótken jyldardaǵy qylmystardy ashýǵa, qarý-jaraq jasyrylǵan oryndardy anyqtaýǵa jáne qoǵamdyq qaýipsizdikke tónýi múmkin qaterlerdiń aldyn alýǵa jıi kómektesedi. Bul Qylmystyq-atqarý júıesi qyzmetkerleriniń basqa da quqyq qorǵaý organdarymen ózara is-qımyl aıasyndaǵy kúndelikti jumysynyń mańyzyn taǵy bir márte dáleldeıdi, – deıdi ol.
Eske salsaq, osyǵan deıin ShQO turǵynynyń ǵasyrdan astam tarıhy bar qarýdy polıtsııaǵa tapsyrǵany habarlanǵan.
