ShQO-da sońǵy úsh kúnde 86 ret shóp órtendi
ÓSKEMEN. QazAqparat – Shyǵys Qazaqstan oblysynda sońǵy úsh kúnde 86 ret shóp órtengen, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńirde 23-26 sáýir aralyǵynda 86 ret shóp órtendi. Tilsiz jaýdyń jalpy aýdany 182,7 gektardy quraǵan. Kóp jaǵdaıda jalynnyń shyǵýyna turǵyndardyń otty abaısyz paıdalanýy sebep boldy.
«Órtti bastapqy kezeńde baqylaý úshin TJD qutqarýshylary kosmomonıtorıngti paıdalanýda. «Geosat» JShS-men jasalǵan kelisimshart negizinde termonúkteler boıynsha derekterdi ýaqtyly alýǵa múmkindik bar. Búgingi tańda ǵaryshtyq tehnologııalardyń kómegimen qutqarýshylar órttiń taralýyn der kezinde anyqtap, aldyn alýda. 2021 jyldyń 11 sáýirinen bastap 46 termııalyq núkte tirkelgen. Ony departamenttiń órt sóndirý bólimsheleri jedel pysyqtap, órttiń odan ári taralýyna jol bermedi», - delingen habarlamada.
Aıta keteıik, zamanaýı mamandandyrylǵan baǵdarlamalyq qamtamasyz etýdiń kómegimen Shyǵys Qazaqstan jáne basqa da oblystar aýmaǵynda táýlik boıy úzdiksiz 1 mln sharshy shaqyrymnan astam qashyqtyqta ǵarysh túsirilimi derekterin jedel qabyldaý jáne saqtaý júrgiziledi.
