ShQO-da sońǵy táýlikte 6 órt boldy
ÓSKEMEN. QazAqparat – Shyǵys Qazaqstan oblysynda bir kúnde 6 órt shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 26 qazan kúni Altaı aýdany Solovevo kentindegi sharýa qojalyǵynyń qorasy órtengen. Jalynnyń jalpy aýdany 9 sharshy metrge jetken.
«Sol kúni Rıdderdegi Býtakovo aýylynda monsha jandy. Órt kórshiles ornalasqan qaraýsyz qalǵan úı men sharýashylyq qora-jaıǵa jaıyldy. Qutqarýshylar jalpy aýdany 80 sharshy metrdi quraǵan tilsiz jaýdy óshirdi. Órttiń shyǵýyna – otty abaısyz qoldaný sebep bolýy múmkin», - delingen aqparatta.
Glýbokoe aýdanyndaǵy Toqtarov kóshesinde jeke turǵyn úı aýlasynda ornalasqan qora-jaıdyń aǵash qurylymdary otqa oranǵan. Qyzyl jalyn 40 sharshy metr alańdaǵy qurǵaq shópke de tarap ketti.
«Oqıǵa ornyna shuǵyl kelip jetken órt sóndirýshiler otty kóp uzamaı aýyzdyqtady. Sondaı-aq osy kúni Úrjar jáne Katonqaraǵaı aýdandarynda jer úıde órt shyqqan. Budan bólek, Kókpekti aýdanynda jeke turǵyn úıdiń aýlasynda 3 tonna shóp órtengen», - delingen habarlamada.
