ShQO-da sońǵy eki kúnde 20 ret dala órtengen
ÓSKEMEN. QazAqparat - Shyǵys Qazaqstan oblysynda demalys kúnderi 20 ret shóp órtendi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, ótken demalys kúnderi Shyǵys Qazaqstanda 20 ret shóp órtengen. Tilsiz jaýdyń jalpy aýdany - 309 gektardy qurady.
«Besqaraǵaı, Abaı, Úrjar, Kúrshim, Aıagóz jáne Kókpekti aýdandarynda dala órtengen. Qyzyl jalyndy aýyzdyqtaýǵa órt sóndirýshiler, ormanshylar, jergilikti atqarýshy organ ókilderi jáne sharýa qojalyqtarynyń jumysshylary qatysty», - dep habarlady vedomstvo ókilderi.
Búginde óńir órt sóndirýshileri kúsheıtilgen rejımde jumys isteýde. Aımaqtaǵy qurǵaq, ystyq aýa raıy jaǵdaıdy qıyndatyp tur. Qutqarýshylar kún saıyn 10-15 ret tutanǵan shópti sóndirýge shyǵady.
