ShQO-da sońǵy bes jylda túlekterdiń shetelge oqýǵa túsýi 4,5 ese azaıǵan
Bul týraly halyq aldynda esep bergen ShQO ákimi Danıal Ahmetov aıtty.
«Bıyl kóptildi bilim berýdi engizý baǵdarlamasynyń jańa kezeńi bastaldy. Bul maqsatta óńirde 1 mlrr teńge qarastyrylǵan. Birinshi kezeń boıynsha 3,7 myń muǵalim tilderdi oqytý ádistemesin meńgerý deńgeıin 14%-dan 89%-ǵa deıin kóterdi. Sonyń nátıjesinde oqýshylardyń bilim sapasynyń ortasha kórsetkishi 20%-dan 53%-ǵa deıin ósti. Osy jyly taǵy 1,3 myń til mamany biliktiligin arttyrady. Sondaı-aq oblystyń barlyq mektepteriniń IT synyptarynda algorıtmdik oılaý men zamanaýı kompıýterlik júıelerdi damytý úshin tsıfrlyq ónimderdi jasaýdyń tereńdetilgen baǵdarlamasyn engizý jalǵasyn tappaq», - dedi aımaq basshysy.
Onyń aıtýynsha, sońǵy eki jylda 2 myńnan astam pedagog baǵdarlamalaý (Python, Flask), robototehnıka (Arduino, IoT) jáne 3D modeldeý (Blender) boıynsha daıarlyqtan ótti. 2021 jyly oblys mektepteri dıdaktıkalyq elektrondy materıaldarmen, robot-konstrýktorlarmen jáne drondarmen jabdyqtalatyn bolady.
Jańa jabdyqtarmen jumys isteý úshin 600 ınformatıka jáne fızıka muǵalimin kýrstyq daıarlaýdan ótkizý kózdelip otyr.
Sonymen qatar «Jas Maman» kásiptik-tehnıkalyq bilim berý júıesin damytý boıynsha jumystar jalǵasýda. Bul baǵytta 5 bazalyq kolledj janynan quzyrettilik ortalyqtar qurylǵan. Bıyl taǵy da osyndaı 5 ortalyq ashylady.
Oblys ákiminiń aıtýynsha, «Bilikti maman» jobasy da sátti júzege asyrylýda. Sonyń nátıjesinde sońǵy 5 jyl ishinde túlekterdiń sheteldik joǵary oqý oryndaryna túsý deńgeıi 4,5 esege azaıǵan.
