ShQO-da sońǵy bes jylda 3 myńnan astam medıtsınalyq zamanaýı jabdyq alyndy
ÓSKEMEN. QazAqparat –Shyǵys Qazaqstan oblysynda sońǵy 5 jylda medıtsına salasynda halyqaralyq standarttarǵa sáıkes keletin 3 myńnan astam jabdyq satyp alynǵan, dep habarlaıdy QazAqparat tilshisi.
ShQO Aqparat ortalyǵynyń málimetine súıensek, óńirde táýelsizdiktiń 30 jylynda medıtsına salasy qarqyndy damydy.
«Qazaqstandyqtar em alý úshin shetelge shyǵýǵa májbúr bolǵan edi. Shyǵys Qazaqstanda medıtsınany damytý boıynsha qabyldanǵan baǵdarlama bul jaǵdaıdy túbegeıli ózgertti. Sońǵy 5 jylda halyqaralyq standarttarǵa sáıkes keletin 3 myńnan astam jabdyq satyp alyndy. Jedel járdem parki 216 kólikke jańartyldy. Aýyldaǵy medıtsınalyq mekemelerdi jabdyqtaý jáne olardy joǵary deńgeıge kóshirý boıynsha sharalar da qabyldanǵan», - delingen málimette.
Semeı qalasynyń onkologııalyq dıspanseriniń ıadrolyq medıtsına ortalyǵynda Qazaqstandaǵy alǵashqy biregeı radıonýkleıdtik terapııa bólimshesi ashyldy. Onda búgingi kúni 100-den astam naýqas emdelip, 350-den astam adam dıagnostıkalyq zertteýlerden ótti.
Nursultan Nazarbaev qorynyń qoldaýymen alǵashqylardyń biri bolyp Óskemende «Qamqor» ońaltý ortalyǵy ashyldy. Ortalyqta jańa tehnologııalar, mamandardyń bilikti kómegi, mehanoterapııa jáne tuz bólmeleri bar. Tirek-qımyl apparaty nemese ortalyq júıke júıesi buzylǵan balalardyń óz qatarlastarymen birge damýy úshin jaǵdaı jasalǵan.
«Óskemende gematologııa ortalyǵynyń qurylysy jalǵasýda. Jasýshalyq jáne gendik-ınjenerlik tehnologııalardy paıdalaný jobanyń biregeı resýrsy bolady. Óńirde medıtsına kadrlaryn sheteldik klınıkalarda onkologııa, kardıologııa jáne kardıohırýrgııa, neırohırýrgııa, medıtsınalyq ońaltý, gınekologııa syndy basym baǵyttar boıynsha oqýǵa jiberý baǵdarlamasy tabysty iske asyrylýda», - delingen habarlamada.
