ShQO-da sońǵy bes jylda 200-den astam dáriger shetelde biliktiligin arttyrdy
ShQO ákimdiginiń málimetine súıensek, óńirde bıyl densaýlyq saqtaý júıesin damytýǵa 30 mlrd teńge bólingen.
«2025 jylǵa deıin oblysta 5,6 mlrd teńgege medıtsınalyq jabdyqtar, onyń ishinde aýdandyq aýrýhanalar úshin 3 mlrd teńgege 6 kompıýterlik tomograf satyp alý josparlanýda. Bıyl onkologııalyq aýrýlardy erte dıagnostıkalaý maqsatynda Óskemendegi kópsalaly onkologııa jáne hırýrgııa ortalyǵynda ǵımaratty jańǵyrtý jumystary júrgiziledi. Qazirgi ýaqytta qalada biregeı gematologııa ortalyǵy men 140 tósektik statsıonary bar aýrýhana kesheniniń qurylysy jalǵasýda», - deıdi aımaq basshysy Danıal Ahmetov.
Budan bólek, Rıdder qalasynda bir aýysymda 500 adam qabyldaıtyn emhana qurylysy bastaldy. Ulan aýdany Qasym Qaısenov kentinde 150 adam qabyldaıtyn emhana salynady.
Jalpy Shyǵys Qazaqstandaǵy aýyldarda 7,9 mlrd teńgege 36 medıtsınalyq nysan salý kózdelip otyr. Jyl sońyna deıin 16 medıtsınalyq uıymda kúrdeli jóndeý júrgizilmek.
«Ótken jyly gematologııa, neırohırýrgııa, kardıologııa, ana men bala baǵyttary boıynsha oblystyń 36 medıtsına qyzmetkeri Izraıl, Reseı jáne Germanııanyń jetekshi klınıkalarynda biliktilik arttyrdy. Osy jyly Izraıl, Latvııa, Germanııa jáne Reseı elderiniń emhanalarynda 27 dárigerdi oqytý josparlanǵan. 2017 jyldan bastap oblystyń medıtsına salasyndaǵy 210 mamany shetelde óz biliktiligin arttyrdy», - deıdi oblys ákimi.