ShQO-da sońǵy úsh jylda 117 orman jáne dala órti tirkelgen

ÓSKEMEN. KAZINFORM – Shyǵys Qazaqstan oblysynda órt qaýpi joǵary kezeń bastalýǵa taıaý.

Óńirdiń jalpy aýmaǵy 9,7 mln gektardy qurasa, onyń 3 mln gektary orman qory. Sondyqtan órt qaýipsizdigin qamtamasyz etý - ekojúıeni saqtaý men halyq qaýipsizdigin qorǵaýda asa mańyzdy. 

Sońǵy úsh jylda óńirde jalpy aýmaǵy 707 gektardy qamtyǵan 117 orman jáne dala órti tirkelgen. Ótken jyly 204 gektar aýmaqta 27 órt boldy. Bıyl órt qaýpi joǵary kezeń resmı túrde 13 sáýirden bastalady.

- Qazirgi tańda oblysta qajetti kúshter men quraldar jasaqtalǵan. Órt sóndirý jumystaryna shamamen 3,5 myń adam jumyldyrylýǵa ázir. Olardyń qatarynda TJD, orman sharýashylyǵy men erekshe qorǵalatyn tabıǵı aýmaqtardyń qyzmetkerleri bar. Myńǵa jýyq tehnıka, 5 myńnan astam órt sóndirý quraly jáne jaǵdaıdy baqylaýǵa arnalǵan 45 ushqyshsyz ushý apparaty ázir, - dep habarlady oblys ákimdiginen. 

Órtterdi erte anyqtaý júıesin damytý aıasynda 9 orman sharýashylyǵynda baqylaý munaralaryn ornatý úshin 90 núkte belgilendi. Bul jobanyń boljamdy quny - 13 mlrd teńge. Qurylys-montajdaý jumystary jýyrda bastalmaq.

Aıta keteıik, 8 sáýir kúni Shyǵys Qazaqstanda bıylǵy alǵashqy dala órti tirkeldi. 10 gektar aýmaqqa jaıylǵan tilsiz jaý der kezinde oqshaýlanyp, tolyqtaı sóndirilgen.

Eske salsaq, osyǵan deıin SQO-da orman órtteriniń aldyn alý sharalary kúsheıtilgeni habarlanǵan.