ShQO-da sońǵy on kúnde kúıeýinen zábir kórgen 151 áıel polıtsııadan kómek surady

ÓSKEMEN. KAZINFORM – Shyǵys Qazaqstan oblysynda sońǵy on kúnde kúıeýinen zábir kórgen 151 áıel polıtsııadan kómek suraǵan.

ShQO Polıtsııa departamenti baspasóz qyzmetiniń málimetine súıensek, «Turmys» jedel aldyn alý sharasynda otbasylyq-turmystyq qarym-qatynas salasynda 770-ten astam quqyq buzýshylyq anyqtaldy.

Oblys boıynsha otbasynda jıi janjal shyǵaratyn 185 adam esepke alynǵan. Olarǵa qatysty jábirlenýshilerge jaqyndaýǵa tyıym salatyn qorǵaý uıǵarymy shyǵarylǵan. Alaıda 37 adam atalǵan shekteýlerdi buzyp, jaýapkershilikke tartyldy.

- Jalpy 10 kúnge sozylǵan reıd barysynda tártip saqshylary 3 myńǵa jýyq azamatty tekserdi. Nátıjesinde 778 ákimshilik quqyq buzýshylyq tirkelgen. Sot sheshimimen alkogoldik ishimdik ishýge jáne otbasynda janjal shyǵarýǵa tyıym salynǵan 81 er adamǵa qatysty «erekshe talaptar» qoıyldy. Alaıda bul talaptardy oryndamaǵan 37 azamat QR ÁQBtK-niń 669-baby boıynsha jaýapkershilikke tartyldy, - delingen aqparatta.

10 kún ishinde kúıeýinen zábir kórgen 151 áıel polıtsııadan kómek suraǵan. 11 jábirlenýshi ýaqytsha turýǵa arnalǵan baspanaǵa ornalastyryldy.

- Máselen, polıtsııaǵa 30 jastaǵy áıel habarlasyp, kúıeýiniń mas kúıde uryp-soqqanyn aıtqan. Tártip saqshylary áıel adamdy daǵdarys ortalyǵyna jiberip, al quqyq buzýshyny sot belgilegen arnaıy talaptardy oryndamaǵany úshin jaýapkershilikke tartty. Materıaldar sotqa joldanyp, zań buzýshy 10 táýlikke qamaýǵa alynady, - delingen habarlamada.

Eske salsaq, osyǵan deıin Shyǵys Qazaqstanda qos azamattyqpen júrgen 7 adam anyqtalǵany habarlanǵan.