ShQO-da soǵys batyrynyń nemeresi týǵan aýylyna balabaqsha syılady

ÓSKEMEN. QazAqparat - KSRO batyry Qoıgeldi Aýhadıevtiń  nemeresi Erjan Qoıgeldın týǵan aýylyna balabaqsha syılady, dep habarlaıdy «QazAqparat» HAA tilshisi.

Kókpekti aýdanyndaǵy jergilikti «Órnek» sharýa qojalyǵynyń basshysy Erjan Qoıgeldın «Týǵan jer» baǵdarlamasy men memlekettik-jeke seriktestik aıasynda Preobrajenka aýylynda balabaqsha saldy. Balabaqsha qaraýsyz qalǵan ǵımarattyń ornyna salyndy. 20 adam jumyspen qamtamasyz etilse, 40 bala mektepke deıingi zamanaýı mekemede bilim alýǵa múmkindik bar.

Mektepke deıingi bilim berý mekemesine ShQO ákimi Danıal Ahmetov Kókpekti aýdanyna jasaǵan jumys saparynda bardy. Ol balabaqshany aralap, búldirshinderge mýzykalyq ortalyq syıǵa tartty.

Oblys ákimi aýyl balabaqshasynyń qaladaǵy bilim berý mekemelerinen kem túspeıtinin atap ótti. «Erjan Qoıgeldın sekildi ár adam óz jerlesterine kómek bere alady», - dep atap ótti Danıal Ahmetov.