ShQO-da soǵys jáne eńbek ardageri Qurmat Rahımov ómirden ozdy

ÓSKEMEN. KAZINFORM – Shyǵys Qazaqstan oblysynda 102 jasqa qaraǵan shaǵynda soǵys ardageri Qurmat Rahımov ómirden ozdy. Osyǵan baılanysty ShQO ákimi Nurymbet Saqtaǵanov kóńil aıtty.

- Uly Otan soǵysynyń ardageri Qurmat Rahımovtyń dúnıeden ozǵany týraly qaraly habardy tereń kúızelispen qabyldadym. Bul muqym jurt úshin orny tolmas aýyr qaza. Tarıhymyzdyń bir kezeńin arqalaǵan jeńimpaz býynnyń qatary sırep barady. Osy qıyn sátte Shyǵys Qazaqstan oblysynyń turǵyndary men óz atymnan marqumnyń týǵan-týystary men jaqyndaryna qaıǵyra kóńil aıtamyn, - dedi ákim.

Sondaı-aq óńir basshysy Qurmat Rahımovtyń ǵıbratty ǵumyry - erlik pen Otanǵa adal qyzmet etýdiń, bıik azamattyq jaýapkershiliktiń jarqyn úlgisi ekenin atap ótti.

Surapyl soǵys jyldarynda ol el qorǵaýǵa attanyp, maıdan dalasynda erlik kórsetip, tabandylyq pen qaısarlyq tanytty. Beıbit ómirde de óz boryshyna adal bolyp, el ıgiligi jolynda aıanbaı eńbek etip, sanaly ǵumyryn halyq pen memleketke qyzmet etýge arnady.

Onyń qoǵamdyq-saıası saladaǵy jáne quqyq qorǵaý organdaryndaǵy kópjyldyq eńbegi talaı býyn úshin ómir mektebine aınaldy. Ol ustanymy berik, parasatty, júregi keń tulǵa edi. Ár sózi salmaqty, ár isi mándi boldy. Mundaı jandar elge rýhanı baǵdar berip, artynda óshpes iz qaldyrady.

-Qurmat Rahımovtyń ómirden ozýymen biz tutas bir dáýirden aıyrylyp otyrmyz. Onyń jarqyn beınesi, bolattaı beriktigi men Otanǵa degen adaldyǵy halyq jadynda máńgi saqtalady. Otbasy men jaqyndarynyń qaıǵysyna ortaqtasyp, sabyr men tózim tileımin. Marqumnyń aldy peıish, arty kenish, ımany salamat bolsyn!,-delingen oblys ákiminiń sózinde.