ShQO-da soǵys ardageri 100-ge keldi
ÓSKEMEN. KAZINFORM - Shyǵys Qazaqstan oblysynda turatyn Ekinshi dúnıejúzilik soǵys ardageri Qurmet Rahımov 100 jasqa keldi.
Óskemende soǵys ardageriniń mereıtoıyna oraı qabyrǵa sýreti men qurmet taqtasynyń ashylý saltanaty ótti. Oǵan QR Іshki ister mınıstriniń orynbasary polıtsııa general-maıory Aıdar Saıtbekov, soǵys ardagerleri, Qurmat Rahımulynyń týystary men jaqyndary qatysty.
– «Qazaqstan Respýblıkasynyń Іshki ister mınıstri polıtsııa general-leıtenanty Erjan Sadenovtiń, jeke quramnyń jáne jeke ózimniń atymnan Qurmat Rahymulyn 100 jyldyq mereıtoıymen quttyqtap, zor densaýlyq, qajymas qaırat tileımin. Bul saltanatty sharanyń polıtsııa kúni qarsańynda ótkenine qýanyshtymyz. Barshamyz úshin erliktiń, Otanǵa degen súıispenshiliktiń nyshany ispetti qyzmet etken osyndaı tulǵanyń qasymyzda ómir súrip jatqany naǵyz baqyt», - dedi Aıdar Saıtbekov.
Mereıtoı ıesi úshin fotosýretteri bar retro-lenta uıymdastyrylyp, 1960-shy jyldardyń stılindegi jumys kabınetiniń buryshy jasaldy. Onda oblys ákimi Ermek Kósherbaev Qurmat Rahımulyn quttyqtap, Soljaǵalaý saıabaǵynda ardagerlermen birge soldat botqasynan dám tatty.
Aıta keteıik, Qurmat Rahımov 1942 jyly maıdanǵa attanǵan. Nevel qalasynan Kenıgsbergke deıin, Belarýs, Lıtva jáne shyǵys Prýssııa aýmaqtary arqyly shaıqastarǵa qatysqan. Sol jerde kópten kútken Jeńisti qarsy alǵan.
1965 jyly Óskemende polıtsııa pogonyn taǵyp, oblystyq ІІB bastyǵynyń orynbasary qyzmetin atqarǵan. Al 1981 jyly qurmetti eńbek demalysyna shyqqan.
Uly Otan soǵysy jáne ІІO ardageri II dárejeli Otan soǵysy ordenimen, "Kenıgsbergti alǵany úshin", "Germanııany jeńgeni úshin", "Jaýyngerlik eńbegi úshin" medalderimen jáne basqa da mereıtoılyq nagradalarmen marapattalǵan. Al bıyl aqsaqal Memleket basshysy Qasym-Jomart Toqaevtyń atynan "Qurmet" ordenimen marapattaldy.
