ShQO-da SMM mamandyq retinde oqytylatyn boldy
ÓSKEMEN. QazAqparat - Óskemende SMM mamandaryn daıyndaý qolǵa alynbaq. Áleýmettik medıa marketıng maıtalmany bolý úshin talapkerler kem degende 4 jyl oqýy kerek, dep habarlaıdy QazAqparat tilshisi.
D.Serikbaev atyndaǵy ShQMTÝ bazasynda SMM mamandaryn daıyndaý qolǵa alynbaq. Osy maqsatta bilim ordasy Almatydaǵy Halyqaralyq aqparattyq tehnologııalar ýnıversıtetimen seriktestik ornatqan. Qos ýnıversıtettiń ókilderi jańa mamandyqtyń tusaýyn kesip, memorandýmǵa qol qoıdy. Marketolog, jýrnalıst jáne PR mamanynyń qyzmetin bir ózi atqaratyn ámbebap tulǵaǵa búgingi aqparat naryǵy óte zárý. Osy suranysty qamtý úshin tehnıkalyq ýnıversıtet jańa baǵdarlama ashyp otyr.
«Bizdiń ýnıversıtet zaman talabyna saı beıimdelip, buǵan deıin de birneshe zamanaýı oqý baǵdarlamalaryn aınalymǵa engizgen bolatyn. Sonymen shektelmeı búgin taǵy bir jańa kókjıek ashtyq. Qazir qatyp qalǵan tehnıkalyq mamandyq nemese birjaqty gýmanıtarlyq kásip degen uǵym joq. Sondyqtan, ózimiz úshin tyń baǵytqa jol salyp otyrmyz» - deıdi ýnıversıettiń birinshi prorektory Sáýle Rahmetýllına.
Jańa mamandyqqa stýdent qabyldaý jańa oqý jylynda bastalýy múmkin. Bolashaq SMM-shiler bir jylyn Almatydaǵy Halyqaralyq aqparattyq tehnologııalar ýnıversıtetinde ótkizedi. Onda olar jýrnalıstıka men PR-dyń qys-syryn meńgerse, Óskemende ІT-tehnologııalar men marketıng salasy boıynsha qabiletterin qalyptastyrady.
«Bul mamandyq bakalavrıat deńgeıimen shektelmeıdi. Magıstratýraǵa arnalǵan baǵdarlama da daıyndap jatyrmyz. Oqý baǵasy ózge de mamandyqtarmen deńgeıles bolýy kerek», - deıdi ýnıversıtettiń oqý jáne ádistemelik ister jónindegi prorektory Jadyra Qońyrbaeva.
