ShQO-da skýter júrgizýshisin qaǵyp óltirgen er adam 2,5 jylǵa túrmege qamaldy

ÓSKEMEN. KAZINFORM – Shyǵys Qazaqstan oblysynda skýter júrgizýshisin qaǵyp óltirgen er adamǵa sot úkimi shyqty.

ShQO soty baspasóz qyzmetiniń málimetine súıensek, jol-kólik oqıǵasy osy jyldyń qazan aıynda Altaı qalasynda bolǵan. 

Panfılov kóshesimen kele jatqan kólik júrgizýshisi solǵa burylǵan kezde skýterdi baıqamaı qalyp, qaǵyp ketken. Sonyń saldarynan aýyr jaraqat alǵan jábirlenýshi aýrýhanada kóz jumdy. 

— Sot sheshimimen aıyptalýshy kináli dep tanylyp, 2 jarym jylǵa bas bostandyǵynan aıyryldy. Sondaı-aq oǵan 5 jylǵa kólik basqarýǵa tyıym salyndy, — delingen aqparatta.

Úkim áli zańdy kúshine engen joq.

Eske salsaq, osyǵan deıin Óskemende eki balany qaǵyp ketken kólik júrgizýshisi 3 kúnnen beri tabylmaı jatqany habarlanǵan.