ShQO-da sirińkemen oınaǵan balalar podezd esigin órtep jibergen
ÓSKEMEN. QazAqparat – Shyǵys Qazaqstan oblysynyń Kúrshim aýdanynda kópqabatty úıdiń kireberisinde órt shyǵyp, 20 adam evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 3 maýsym kúni órt sóndirý bólimine 5 qabatty turǵyn úıdiń podezd esigi janyp jatqany týraly habar túsken. Turǵyndar órt sóndirýshiler kelip jetkenin kútpesten, órtti sóndirmek boldy.
«Oqıǵa ornyna dereý jetken №30 órt sóndirý bóliminiń qyzmetkerleri podezd esigi men sol mańaıda turǵan balalar arbasyn sharpyǵan tilsiz jaýdy aýyzdyqtaýǵa kiristi. Sonymen qatar olar gazdyń jarylýyna jol bermes úshin gaz qubyryn sýytqan. Podez ishin tútin tumshalaǵandyqtan 20 adam qaýipsiz jerge kóshirildi. Onyń ishinde 12 bala bar», - dep habarlady vedomstvo ókilderi.
Qazirgi málimet boıynsha, órttiń shyǵýyna balalardyń sirińkemen oınaýy sebep bolǵan.
