ShQO-da sırek kezdesetin sabanshy fototuzaqqa túsip qaldy
ÓSKEMEN. KAZINFORM — Shyǵys Qazaqstan oblysyndaǵy Katonqaraǵaı memlekettik ulttyq tabıǵı parkindegi fototuzaqqa sırek kezdesetin sabanshy túsip qaldy.
Bul joly fototuzaq obektıvine Altaı ulary, Sibir taýtekesi jáne jer betindegi eń jasyryn jabaıy mysyqtardyń biri — sabanshy ilikken.
Sabanshy — óte saq jyrtqysh. Ol ádette adam aıaǵy basa bermeıtin jerlerde tirshilik etedi. Kúndiz ashyq jerde kórinýi sırek. Sondyqtan mundaı vıdeomaterıaldar mamandar úshin erekshe qundy. Ol sırek kezdesetin bul janýar túriniń Shyǵys Qazaqstannyń taýly ekojúıelerin áli de mekendeıtinin dáleldeıdi.
— Sabanshy aýmaqty kezip júrip, jemtigin izdeıdi jáne kamera obektıvine kózi jarqyrap túsip qalǵan, — dep habarlady Katonqaraǵaı ulttyq parkiniń ǵylym, ekologııalyq monıtorıng jáne aqparat bóliminiń mamandary.
Eske salsaq, osyǵan deıin Qaraǵandy oblysynda Qyzyl kitapqa engen arqar fototuzaqqa túskeni habarlanǵan.