ShQO-da sıntetıkalyq esirtki óndiretin zerthananyń qyzmeti toqtatyldy
ASTANA. KAZINFORM — Shyǵys Qazaqstan oblysynda sıntetıkalyq esirtki óndiretin zerthananyń qyzmeti joıyldy. 26 jáne 22 jastaǵy eki kúdiktiniń zańsyz áreketi toqtatyldy. Olardyń shalǵaı aýyldardyń birinde úı alyp, sol jerde sıntetıkalyq esirtki óndirisin uıymdastyrǵany anyqtaldy. Bul týraly Polisia.kz jazdy.
Jedel-izdestirý is-sharalary men tintý barysynda zańsyz aınalymnan zerthanalyq jabdyqtar, 70 keli daıyn sıntetıkalyq «Alfa-PVP» ónimi, sondaı-aq shamamen 4 tonna hımııalyq reagentter men prekýrsorlar tárkilendi.
— Tergeý barysynda qylmystyq árekettiń ınternettiń kóleńkeli segmenti arqyly qashyqtan júrgizilgeni anyqtaldy. Zańsyz aınalymǵa shamamen 250 myń bir rettik doza jiberilmedi. Bul — júzdegen adamnyń ómirin saqtap, azamattardyń, ásirese jastardyń densaýlyǵyn qorǵaýǵa múmkindik berdi. Atalǵan fakti boıynsha Qazaqstan Respýblıkasy Qylmystyq kodeksiniń 297-1-baby boıynsha sotqa deıingi tergep-tekserý bastaldy, — delingen habarlamada.
Esirtki óndirisin uıymdastyrýshylarǵa ómir boıyna bas bostandyǵynan aıyrý jazasy qarastyrylǵan. Esirtki qylmysyna qarsy is-qımyl — Іshki ister mınıstrliginiń basym baǵyttarynyń biri bolyp qala beredi. Kez kelgen zańsyz áreket qatań túrde toqtatylatyn bolady. Bul baǵyttaǵy jumys jalǵasady.
