ShQO-da «sıg» tuqymdas balyqtardy aýlaýǵa tyıym salyndy

ÓSKEMEN. KAZINFORM – Shyǵys Qazaqstan oblysynda «sıg» tuqymdas balyq túrlerin aýlaýǵa ýaqytsha shekteý engizildi. Bul tyıym olardyń ýyldyryq shashý kezeńiniń bastalýyna baılanysty qabyldanyp otyr.

Shekteý 10 jeltoqsanǵa deıin kúshinde bolady. Zaısan-Ertis aımaqaralyq basseındik balyq sharýashylyǵy ınspektsııasynyń málimetinshe, tyıym Buqtyrma jáne Óskemen sý qoımalarynda, Ertis ózeniniń Óskemen SES-inen Shúlbi sý qoımasyna deıingi jáne odan ári Pavlodar oblysynyń shekarasyna deıingi bóliginde, Qanysh Sátbaev atyndaǵy arnadaǵy №1 gıdroýzliniń sý qoımasynda qoldanylady.

- Dál osy ýaqytta «sıg» tuqymdas balyqtar - sıg, pelıad jáne rıpýs túrleri kóbeıedi. Sol sebepti balyq aýlaý erejeleriniń saqtalýyna baqylaý kúsheıtilip, sý aıdyndarynda polıtsııa jáne tabıǵat qorǵaý organdarynyń qatysýymen birlesken reıdter júrgizilip jatyr, - dep habarlady ınspektsııadan.

Aıta keteıik, tyıym salynǵan kezeńde zańsyz balyq aýlaǵandarǵa ákimshilik jáne qylmystyq jaýapkershilik qarastyrylǵan.

Eske salsaq, osyǵan deıin Qyzylordada jalǵan qujatpen balyq eksporttaǵandar 2 jylǵa sottalǵany habarlanǵan.