ShQO-da sibir eligin atqan brakonerge sot úkimi shyqty

Shyǵys Qazaqstan oblysynda sibir eligin atyp alyp, memleketke 1,2 mln teńge zalal keltirgen brakoner sottaldy, dep habarlaıdy QazAqparat tilshisi.

ShQO Orman sharýashylyǵy jáne janýarlar dúnıesi aýmaqtyq ınspektsııasynyń málimetine súıensek, shilde aıynda polıtseıler Altaı qalasynyń turǵyny tizgindep kele jatqan kólikti toqtatqan. Tártip saqshylary kólikten sibir eliginiń etin tapty.

Anyqtalǵandaı, er adam Nıkolsk aýylynyń mańynda ańdy atyp alǵan. Sonyń saldarynan memleketke 1 293 750 teńge shyǵyn keltirdi. Tergeý amaldary aıaqtalǵan soń is sotqa jetip, qyrkúıek aıynyń ortasynda úkim shyqty.

«Sot sheshimimen aıyptalýshy QR Qylmystyq Kodeksiniń 337-baby 1-bóligimen (zańsyz ańshylyq) kináli dep tanyldy. Oǵan eki jyl merzimge ań aýlaýǵa tyıym salynyp, 200 AEK (690 000 teńge) mólsherinde aıyppul salyndy. Memleketke keltirilgen materıaldyq zalal tolyqtaı óteldi», - delingen aqparatta.