ShQO-da shyǵatyn «Dıdar» gazeti 85 jyldyǵyn atap ótti
ASTANA. QazAqparat - ShQO ákimi Danıal Ahmetovtiń oblystyq «Dıdar» gazetiniń ujymyn basylymnyń mereıtoıymen quttyqtady.
Oblys ákimi baspasóz qyzmetiniń habarlaýynsha, jańalyqtardyń jarshysy bolǵan aımaqtaǵy aǵa basylym - «Dıdar» gazeti bıyl 85 jasqa tolyp otyr. 1931 jyldyń 24 qazanynda Kendi Altaıdyń etegindegi kenshiler shahary - Rıdderde «Jumysshy» degen atpen ómirge kelgen gazet osy ýaqyt shıreginde óz oqyrmandarymen birge talaı belesterden ótken.
«Keshegi almaǵaıyp zamanda «Qazaq aktıvin» uıymdastyrýshylardyń biri bolǵan, ult múddesi úshin basyn báıgege tikken ultjandy redaktor Maqsut Taıshybaevtyń eń birinshi bolyp basylym tizginin qolyna alýy gazettiń búgingi ustanymy men baǵyt-baǵdaryn sol kezde-aq aıqyndap bergen sekildi. Odan bergi kezeńderde «Sotsıalıstik Altaı», «Altaı bolshevıgi», «Kommýnızm týy» degen atpen jarııalanyp, Táýelsizdik tańy atar shaqta shyǵystyń «Dıdaryna» aınalǵan basylym ana tilimizdiń órisin keńeıtýde ózindik úlesin qosyp, rýhanııaty men mádenıetiniń, tarıhy men ádebıetiniń joǵyn joqtaýda, kem-ketigin túgendeýde áýelgi baǵytynan aınyǵan emes», delingen ákimniń quttyqtaýynda.
Egemendikpen erkin tynystaǵan qazirgi shaqta da «Dıdardyń» betinde ultymyzdyń bıik murat-maqsattarymen qatar, jas memleketimizdiń ekonomıkalyq jańarýy men áleýmettik jańǵyrýy, zaıyrly hám demokratııalyq qoǵamdaǵy oń ózgerister udaıy jaryq kórýde.
85 jyldyq tarıhynda óńir jýrnalıstıkasynyń ustahanasyna aınalǵan basylymnan belgili akademık Sherıazdan Eleýkenov, ǵylym doktory Jumaǵalı Ysmaǵulov, sondaı-aq, qarasózdiń has sheberleri Oralhan Bókeı, Ulyqbek Esdáýletov, Dıdahmet Áshimhanov, Músilim Qumarbekov, Keńes ıÝsýpov syndy kóptegen qalamgerler qanatyn qataıtqan.
Oblystyq gazet respýblıkalyq baıqaýlarda jeńimpaz atanǵan kezderi az emes. 2006 jyly Qazaqstan Jýrnalıstıka akademııasynyń «Altyn Juldyzyn» ıelense, 2007 jyly Prezıdent Grantyna qol jetkizgen.
