ShQO-da shildede aptap ystyq pen jańbyr jıi almasyp turmaq
ÓSKEMEN. KAZINFORM – Shyǵys Qazaqstan oblysynda shilde aıynda aptap ystyqpen qatar, nóser jańbyr men naızaǵaı jıileıdi. Aýa raıynyń osylaı qubylyp turýy jazdyń ekinshi aıynyń basty ereksheligi bolmaq.
«Qazgıdromet» RMK boljamyna sáıkes, shildeniń alǵashqy kúnderinde óńirge belsendi tsıklon áser etip, ótkinshi jańbyr jaýyp, naızaǵaı oınaıdy. Keı jerlerde burshaq jaýyp, jel ekpini kúsheıýi múmkin.
Odan keıin aımaqta qaıtadan ystyq kúsheıgenimen, uzaqqa sozylmaıdy.
- Shildeniń alǵashqy onkúndiginde Qazaqstannyń shyǵysynda kúndizgi aýa temperatýrasy birtindep +30...+38 gradýstan +25...+35 gradýsqa deıin tómendeıdi. Keıin aptap ystyq nóserli jańbyr, naızaǵaı jáne jeldiń kúsheıýimen almasyp otyrady», - dep málim etti «Qazgıdromet» mamandary.
Aıdyń ekinshi jartysynda da aýa raıy turaqsyz bolady. Aptap ystyq salqyndaý kúndermen jáne jaýyn-shashynmen kezektesip otyrady.
Sonymen qatar Shyǵys Qazaqstan shilde aıynda jaýyn-shashyn mólsheri klımattyq normadan joǵary bolady dep boljanǵan óńirlerdiń qataryna endi. Sınoptıkterdiń málimetinshe, aı boıy oblysta 25-ten 85 mıllımetrge deıin jaýyn-shashyn túsýi múmkin. Al aımaqtyń ońtústik bóliginde bul kórsetkish kópjyldyq ortasha deńgeıden sál joǵary bolady.
Jańbyrly kúnderge qaramastan, shilde aıy jazǵa tán ystyǵynan ada bolmaıdy. Eń ystyq kúnderi aýa temperatýrasy qaıtadan +30 gradýstan joǵary kóteriledi.
Eske salsaq, osyǵan deıin AQSh-ta aptap ystyq saldarynan shamamen 162 mıllıon adamnyń ómirine qaýip tónip turǵany habarlanǵan.
