ShQO-da sheteldik nómiri bar kólikterin rásimdep jatqandar artýda
ÓSKEMEN. QazAqparat – Shyǵys Qazaqstan oblysynda sheteldik nómiri bar kólikterdi ýaqytsha tirkeýge qoıǵandar sany artýda, dep habarlaıdy QazAqparat.
ShQO Polıtsııa departamentiniń baspasóz qyzmetinen málim etkendeı, búginde Reseı nómiri bar 6 kólik ýaqytsha tirkeýge alynǵan. Rásimdeý boıynsha alǵashqy protsedýra Semeı qalasynda jasalǵan. Ákimshilik polıtsııa bóliminiń qyzmetkerleri júrgizýshilerge jańa úlgidegi sary tústi arnaıy nómir bergen.
«7-10 aqpan aralyǵynda Óskemen jáne Shemonaıha qalasynyń turǵyndary kólikterin ýaqytsha tirkeýge qoıdy. Qazaqstan Respýblıkasynyń zańnamasyna sáıkes ótinish berýshiler quqyq qorǵaý organdarynyń qyzmetkerlerine barlyq qajetti qujattardy, memlekettik nómir alǵany úshin baj salyǵyn jáne alǵashqy tirkeý jarnasyn tóledi», - delingen vedomstvo málimetinde.
Aıta ketsek, sońǵy 10 kúnde Shyǵys Qazaqstan oblysynyń Halyqqa qyzmet kórsetý ortalyqtarynda 290-nan astam adam kólik quraldaryn ýaqytsha tirkeý týraly keńes alǵan.
Eske salaıyq, Memleket basshysy Qasym-Jomart Toqaev 24 qańtar kúni ótken Úkimettiń keńeıtilgen otyrysynda Qazaqstannyń zańnamasyna saı kelmeıtin sheteldik kólikterdi elge kirgizbeýdi tapsyrdy.
Sondaı-aq Úkimetke Qazaqstan azamattary EAEO elderinen ákelgen kólikterdi bir aıdyń ishinde ýaqytsha tirkeýge qoıýdy júktedi.
«Bul kólikterdiń tirkelýi 2021 jyldyń 1 naýryzyna deıin kúshinde bolady. Mundaı kólikter tehnıkalyq reglamenttiń talaptaryna saı bolýy kerek. Sondaı-aq, tirkeý somasy men memlekettik bajdy tóleýi tıis. Ýaqytsha tirkeý bir qoldan ekinshi qolǵa satylyp baryp, jasalmaýy tıis. 2021 jyldyń 1 naýryzyna deıin avtokólik ıeleri kólikterin turaqty tártipte tirkep, kedendik baj ben ýtılızatsııalyq somany tóleýi tıis. Bolmasa ol kólikti elden shyǵarýy nemese zańnamamen tyıym salynbaıtyn basqa da amalmen máselesin retteýi qajet. Úkimetke Qazaqstannyń zańnamasyna qaıshy keletin kólikterdi budan ary kirgizbeýdi jáne paıdalanýǵa shekteý qoıý sharalaryn qolǵa alýdy tapsyramyn», - dedi Memleket basshysy.
