ShQO-da sheteldik 10 azamat elden shyǵaryldy
ÓSKEMEN. QazAqparat – Shyǵys Qazaqstan oblysynda sheteldik 10 azamat elden shyǵaryldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 6 jeltoqsanda óńir aýmaǵynda «Mıgrant» jedel aldyn alý sharasy bastalǵan. Bir kún ishinde 140-tan astam sheteldik azamat jaýapqa tartyldy. Sondaı-aq quzyrly organdarǵa sheteldikterdiń kelýi týraly ýaqytyly habarlamaǵan oblystyń 58 turǵynyna aıyppul salyndy.
«Sot sheshimimen 10-nan astam sheteldik QR aýmaǵynan shyǵaryldy. Budan bólek, ózge elden jumys kúshin tartý jáne paıdalaný erejelerin buzǵany úshin on laýazymdy tulǵa ákimshilik jaýapkershilikke tartyldy. Jumysshylarda tirkeý jáne eńbek qyzmetimen aınalysýǵa arnaıy ruqsattyń bolmaýy jıi kezdesetin másele», - dedi ShQO PD Kóshi-qon qyzmeti basqarmasynyń bastyǵy Erbol Bekbaev.
Onyń aıtýynsha, osyndaı kezde zańǵa sáıkes sheteldik azamattardyń tólqujattary sotqa usynylady. Sot úkimi boıynsha jumysshylardy kóshi-qon polıtsııasynyń mamandary elden shyǵarady.
