ShQO-da shetel azamattyǵyn jasyrǵan 48 adam jaýapqa tartyldy
ÓSKEMEN. KAZINFORM - Shyǵys Qazaqstan oblysynda jyl basynan beri 48 adam ózge memlekettiń pasportyn alǵanyn jasyrǵany anyqtaldy.
Zańǵa sáıkes, shetel azamattyǵyn alǵan sátten bastap adamnyń Qazaqstan azamattyǵy toqtatylady. Ol bul týraly kóshi-qon qyzmetine jazbasha habarlap, Qazaqstan Respýblıkasynyń pasportyn jáne jeke kýáligin 30 kún ishinde óz erkimen tapsyrýy tıis. Belgilengen merzimdi saqtamaý zańbuzýshylyq bolyp sanalady. Osyndaı derekterdiń biri Glýbokoe aýdanynda anyqtaldy.
– 63 jastaǵy jergilikti turǵyn 2023 jyldyń shilde aıynda kórshiles memlekettiń azamattyǵyn alǵan. Alaıda zańda belgilengen bir aı ishinde ýákiletti organdarǵa habarlaspaı, QR qujattaryn saqtap kelgen. Bul derek tekserý barysynda anyqtaldy. Quqyq buzýshynyń qazaqstandyq qujattary tárkilenip, azamattyqtan aıyrý rásimderi júrgizildi, – dep habarlady ShQO Polıtsııa departamentinen.
Jyl basynan beri oblys boıynsha 650-den astam adam Qazaqstan azamattyǵynan shyǵarylǵan. Al óńirdiń 48 turǵyny ózge memlekettiń pasportyn alǵanyn jasyryp kelgen.
Kóshi-qon qyzmetiniń málimetinshe, Qazaqstan Konstıtýtsııasyna sáıkes, qos azamattyqqa jol berilmeıdi. Eki memlekette birdeı áleýmettik kepildikterdi, járdemaqylar men jeńildikterdi saqtap qalýǵa baǵyttalǵan áreketter vedomstvoaralyq derekter bazasy arqyly anyqtalady. Mundaı zańbuzýshylyqtar úshin iri kólemde aıyppul salynýy nemese shetel azamattaryn Qazaqstan aýmaǵynan ákimshilik jolmen shyǵarý sharasy qoldanylýy múmkin.
Eske salsaq, osyǵan deıin Pavlodar oblysynda qos azamattyqtyń 27 deregi anyqtalǵany habarlanǵan.
