ShQO-da sheneýnikter ınvestorlarǵa qysym kórsetip, zańsyz aıyppul salǵan
ASTANA. KAZINFORM — Shyǵys Qazaqstan oblysynyń prokýratýrasy Investorlardyń quqyqtaryn qorǵaý komıtettiń úılestirýimen jer qoınaýyn paıdalaný jáne agroónerkásiptik keshen salalarynda jobalardy iske asyrýshy úsh kompanııanyń quqyqtaryn qalpyna keltirdi. Bul týraly prokýratýra málim etti.
Atalǵan kásiporyndardyń ınvestıtsııalarynyń jalpy kólemi 117 jumys ornyn qurýmen 8,4 mıllıard teńgeni quraıdy.
«Zaısan qurylys kompanııasy» JShS jer qoınaýyn paıdalaný salasynda eseptilikti usyný tártibin buzǵany úshin ákimshilik jaýapkershilikke tartylǵany anyqtaldy.
Osyǵan uqsas, «Ertis» JShS jáne «Altyn Shygys» JShS ósimdik sharýashylyǵynyń ákelinetin ónimderine qoıylatyn fıtosanıtarlyq talaptardy saqtamaǵany úshin aıyppul túrindegi jaýapkershilikke tartylǵan.
— Kásipkerlik kodeksine sáıkes, ınvestıtsııalyq jobalardy iske asyrýshy ınvestorlarǵa qatysty ákimshilik isterdi qozǵaýǵa tek prokýrordyń kelisimimen ǵana jol berilýi tıis, — dep habarlady prokýratýradan.
Atalǵan jaǵdaılarda memlekettik organdarmen bul talap saqtalmaǵan.
Prokýratýranyń narazylyqtary boıynsha zańsyz qaýlylar joıyldy. Jiberilgen quqyq buzýshylyqtar úshin úsh laýazymdy tulǵa jalpy somasy 648 myń teńgege ákimshilik jaýapkershilikke aıyppul túrinde tartyldy.
Al Aqtóbede zańsyz páter taratqan sheneýnik 7 jylǵa sottaldy.
