ShQO-da shekteý sharalaryn buzǵandardan jarty mln teńge óndirildi

ÓSKEMEN. QazAqparat – Shyǵys Qazaqstan oblysynda karantın talaptaryn saqtamaǵandardan jarty mln teńgege jýyq aıyppul óndirildi, dep habarlaıdy QazAqparat tilshisi.

Óńirde arnaıy qurylǵan monıtorıngilik toptar shekteý sharalarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıd júrgizýde.

«16 naýryz kúni Óskemende 184 obekti tekserildi. Nátıjesinde sanıtarlyq-epıdemıologııalyq talaptardy buzýdyń 6 faktisi tirkelgen. Sonymen qatar buryn anyqtalǵan buzýshylyqtar boıynsha aıyppul salyndy. Kelýshilerge maskasyz qyzmet kórsetken dúken satýshylary 262 530 teńge tóleýge mindettelgen», - delingen ShQO Aqparat ortalyǵy taratqan málimette.

Semeıde monıtorıngtik toptar tekserý kezinde 341 nysandy qamtydy. Saýda úılerinde, bazarlarda jáne qoǵamdyq kólikterde maska taqpaǵan 9 adam anyqtaldy. 218 775 teńge somasyna 5 hattama toltyrylǵan. Budan bólek, 87 510 teńge mólsherinde eki aıyppul óndirildi.

Rıdderde 5 reıd ótkizilip, sonyń barysynda 73 nysanǵa tekserý júrgizildi. Maska rejımin buzýdyń 5 faktisi tirkelgen. Osyǵan deıin anyqtalǵan buzýshylyqtar boıynsha 87 510 teńge kóleminde 2 aıyppul salyndy.