ShQO-da shekteý sharalary 25 qarashaǵa deıin uzartyldy
Qaýlyda jazylǵandaı, óńir boıynsha karantın 25 qarashaǵa deıin uzartyldy. Shekteý sharalarynyń merzimi oblys aýmaǵynda COVID-19 ınfektsııasynyń taralýy boıynsha ahýaldyń ózgerýine sáıkes qaıta qaralýy múmkin.
«Óskemen, Semeı, Rıdder, Kýrchatov qalalarynyń jáne aýdandardyń perımetri boıynsha shekteý sharalarynyń qoldanylý shekaralary saqtaldy. Óskemen men Semeı qalalarynda 40 ýchaskelik polıtsııa pýnkti qoǵamdyq tártipti baqylaıdy. Turǵyndarǵa jalǵa alynǵan úıler men ǵımarattarda korporatıvtik, saltanatty, otbasylyq jáne basqa da buqaralyq is-sharalar ótkizýge bolmaıdy. 65 jastan asqan adamdarǵa jáne halyqtyń áleýmettik qorǵalatyn toptaryna birinshi kezekte qajetti taýarlardy, azyq-túlik pen dárilik zattardy jetkizýmen aınalysatyn volonterlerdiń jumysy jalǵasady», - delingen qujatta.
Oıyn-saýyq mekemeleriniń jumys isteýine (karaoke, bılıard, kompıýterlik klýbtar, túngi klýbtar, boýlıng ortalyqtary, jabyq úı-jaılardaǵy balalardyń oıyn alańdary men attraktsıondary, kınoteatrlar, býkmekerlik keńseler, fýdkorttar) jáne oblysishilik avtobýstardyń qatynaýyna tyıym saqtalǵan. Sondaı-aq aımaq shekarasyndaǵy 15 sanıtarlyq posttyń jumysy ary qaraı jalǵasa bermek.
«Áleýmettik qashyqtyq pen maskalyq rejımdi saqtaǵan kezde halyqtyń kóshede, saıabaqtarda, jaǵalaýlarda bir otbasy múshelerin qospaǵanda, jeke nemese 3 adamnan aspaıtyn toppen júrýlerine, sondaı-aq ashyq aýada jeke jáne toptyq (5 adamnan aspaıtyn mólsherde) jattyǵý jasaýǵa ruqsat etildi. Qoǵamdyq tamaqtaný nysandary, fıtnes-ortalyqtar saǵat 07.00-den 22.00-ge deıin jumys isteıdi. Biraq demalys jáne mereke kúnderi jabyq bolady. Al azyq-túlik satpaıtyn saýda oryndarynyń, sulýlyq salondarynyń, shashtarazdardyń, monshalar men mádenıet obektileriniń jumys rejımi dúısenbiden-jumaǵa deıin saǵat 07.00-19.00 aralyǵynda jalǵasady», - dep jazylǵan jańa qaýlyda.