ShQO-da shekaralyq aýmaqtaǵy jeke menshikke berilgen jer telimderi tárkilenýi múmkin
ShQO Jer qatynastary basqarmasy basshysynyń orynbasary Dıdar Bolatulynyń aıtýynsha, QR Jer kodeksiniń 23-babyna birqatar ózgeris engizilgen.
«Zańda jańa tarmaq paıda boldy. Soǵan sáıkes shekara aýmaǵynda ornalasqan jer ýchaskeleri jeke menshikke jáne ýaqytsha paıdalanýǵa berilmeıdi. Onda tek mal jaıýǵa jáne shóp shabýǵa ruqsat berilgen. Jer ýchaskesi keıbir jaǵdaılarda memleket paıdasyna májbúrli túrde tárkilenip alynady. Mundaı jaǵdaılarynyń biri – jerdi qorǵanys jáne ulttyq qaýipsizdik qajettilikteri úshin berý. Dese de menshik ıeleri men jer paıdalanýshylardyń shyǵyndary jergilikti atqarýshy organdar zalaldy baǵalaǵannan keıin tolyqtaı óteledi», - dedi ol.
Memleket paıdasyna alynǵan jer ýchaskesinde ornalasqan jyljymaıtyn múliktiń quny olardyń naryqtaǵy baǵasymen esepteledi.
«Jerdi tárkileý – tez aıaqtalatyn sharýa emes. Sondyqtan menshik ıeleri jer telimderiniń tárkilenip alynatyndyǵy týraly aldyn ala habarlanady», - dedi Dıdar Bolatuly.
