ShQO-da shekaradaǵy aýdandardy damytýǵa 218 mlrd teńge jumsalady
Shekara mańyndaǵy 5 aýdan halqynyń ómir súrý sapasyn jaqsartý maqsatynda keshendi jospar ázirlendi. Bul týraly oblys ákimi Danıal Ahmetov halyqqa esep berýinde aıtty.
«2020-2024 jyldar aralyǵynda 218 mlrd teńgege bólinip, Kúrshim, Zaısan, Tarbaǵataı, Katonqaraǵaı jáne Úrjar aýdandarynyń máseleleri men keleshegi jiti pysyqtaldy. Osy rette, ótken jyly Kúrshim men Úrjar aýyldarynda 2 júzý basseıni, Maqanshy aýylynda sport modýli salyndy. Sondaı-aq 17 ekipáterlik jáne 1 otyz páterlik úı paıdalanýǵa berildi. 3 kóppáterli úıdiń qurylysy bastalyp, 105 bilim berý, 6 densaýlyq saqtaý, 9 sport, 31 mádenıet obektileri, 270 shaqyrymnan astam joldar men kósheler jóndeldi», - dedi aımaq basshysy.
Onyń aıtýynsha, Tarbaǵataı, Kúrshim jáne Úrjar aýdandarynyń aýyldaryna sýmen jabdyqtaý jelileri tartylyp, 18 eldi mekenge blokty-modýldi stantsııalar ornatyldy. Shekaralyq aýdandardyń aýrýhanalaryndaǵy perzenthana bólimshelerin II deńgeıge aýystyrý úshin 989 mln teńgege medıtsınalyq jabdyqtar satyp alyndy.
«2021 jyly 4 kóppáterli turǵyn úı, 8 sý qubyry, 4 dene shynyqtyrý-saýyqtyrý kesheni, 2 sport modýli jáne 3 mádenıet obektisiniń qurylysy josparlanyp otyr. 26 bilim berý, 3 densaýlyq saqtaý, 4 sport, 6 mádenıet obektisinde jóndeý jumystary júrgizilmek. 12 sý qubyry jáne 230 shaqyrymnan astam joldar men kósheler jóndeletin bolady. Jalpy bıyl bes shekaralyq aýdandy damytýǵa 59 mlrd teńge jumsalady», - dedi Danıal Ahmetov.
Esterińizge sala ketsek, osyǵan deıin Shyǵys Qazaqstanda 11 myń jumys ornyn ashatyn 38 joba iske asyrylatyndyǵy habarlandy.