ShQO-da shekara shebindegi aýyl halqy aýyz sýdy bastaýdan tasyp ishetindikterine shaǵymdandy
ÓSKEMEN. KAZINFORM — Shyǵys Qazaqstan oblysyndaǵy Katonqaraǵaı aýdany Jazaba aýylynyń halqy ortalyqtandyrylǵan aýyzsýǵa qol jetkize almaı, ınternet ıgiligin kóre almaı otyrǵandaryna shaǵymdandy. Turǵyndar beıneúndeý de jarııalap, ákimdikten qol ushyn sozýlaryn ótingen. Al jergilikti bılik bloktik-modýldik stantsııa ornatylǵanyn, jurt sýdy sol jerden alatyndyqtaryn jetkizdi. Kazinform tilshisi máseleniń mánisine úńilip kórdi.
«Turmysymyz júdep barady»
Búginde aýyl turǵyndary aıtarlyqtaı azaıyp qalǵan. Qazir onda 90 adam ǵana turyp jatyr. Jazaba aýyly Reseımen shekaralas. Eldi meken turǵyndary buryn mańaıda maral jaıylyp, halyq jumys istep, qaınaǵan tirlik bolǵanyn aıtady. Olar aýyl órkenıetten qalyp, kún ótken saıyn turmystary qıyndap bara jatqanyn jetkizdi.
— Buryn úlken mektep te, dúken de bolǵan. Balalarymyzdy aman-esen ósirdik. Al qazir zaman kóshinen qalyp baramyz. Aýrýy asqynǵan adamdarǵa qysta aýylǵa jedel járdem kóligi jete almaıdy, — dedi Qyrmyzy Qyryqbaeva.
Halyq dárigerdiń joqtyǵyn, aýyzsýdy ózennen tasyp iship otyrǵandaryn aıtty.
— Aýdan ákimi kelip esip berip ketti. Endi kabınetinde otyr. Al aýylda ómir súretin biz. Nege shaǵymdarymyzǵa qulaq túrmeıdi? — dep narazylyǵyn bildirdi zeınetkerlerdiń biri.
Katonqaraǵaı osydan birneshe jyl buryn jeke aýdan bolyp qaıta qurylǵan. Turǵyndardyń kóbi sol kezde aýyldardyń ekinshi tynysy ashylyp, jumys orny kóbeıip, ǵalamtor tartylady dep sengendikterin alǵa tartty. Birneshe jyl buryn Jazaba aýylynan kóship ketken Aınash Nurlanova (aty-jóni ózgertilip berildi) bireý-mireý syrqattanyp qalsa, kórshiles Aqsý aýylyna baryp qaralatyndaryn aıtty.
— Jergilikti bılikten kómek surap, beıneúndeý jarııalaǵan soń ákimdikten kelip, jolǵa qıyrshyq tas tókti. Biraq birneshe kólik sol tastarǵa dóńgelegin jaryp aldy. Internet sol kúıi qosylmady. Sýdy baıaǵydaı, bulaqtan tasyp ákelip ishemiz. Ózim ár jazda aýylyma kelip turamyn, — dedi ol.
Ambýlatorııa nege jumys istemeıdi?
Katonqaraǵaı aýdany ákimdiginiń málimetinshe, respýblıkalyq tasjoldan burylys jasap, Jazabany betke alǵandaǵy joldyń jalpy uzyndyǵy 68 shaqyrym. Bul joldy asfalttaý josparda joq.
— Jalpy aýyldaǵy jol jóndeý jumystary «Shyǵys-Jol» mekemesimen kelisimshart jasalǵan. Mekeme qıyrshyqtas tósep, tegisteý jumystaryn júrgizdi. Jazaba aýyly Aksý aýyldyq dárigerlik ambýlatorııasyna qarasty. Aýylda jabdyqtalǵan medıtsına bólimshesiniń úıi bar. Alaıda onda turaqty jumys isteıtin jeke feldsher maman bolmaı tur. Soǵan baılanysty eldi meken turǵyndaryna Aqsý aýyly dárigerlik ambýlatorııasynyń dárigeri men medbıkesi medıtsınalyq kómek kórsetip, densaýlyq jaǵdaılaryn baqylap otyrady, — delingen ákimdiktiń resmı jaýabynda.
Aýdandyq ishki saıasat, mádenıet, tilderdi damytý jáne sport bóliminiń basshysy Gúlnara Jaqsylyqovanyń aıtýynsha, medıtsına feldsheri mamanyn ákelip ornalastyrý úshin aýdandyq aýrýhana ákimshiligi Óskemen men Altaı qalalaryndaǵy medıtsına kolledjderine baryp, stýdenttermen kezdesýler ótkizip otyrady. Aýdandyq bos oryndar jármeńkesine shyǵyp, «Dıplommen aýylǵa» baǵdarlamasy aıasynda kórsetiletin memlekettik qoldaý sharalary týraly habardar etip keledi.
Ákimdik aqparatynsha, aýylda bloktik-modýldik stantsııa jumys istep tur. Ol 2019 jyly ornatylǵan.
— Aýyl turǵyndary sol jerden sý alyp otyr. Mektepke de osy BMS-tan sý tartylǵan. Aldaǵy ýaqytta aýylǵa ortalyqtandyrylǵan sý júıesin tartý josparda bar. Bul joba aýdannyń úsh jyldyq bıýdjetine engizilgen. Sondaı-aq Jazaba aýylyna mobıldik baılanys ornatý jumystary qolǵa alyndy. Qazir «Avrora» merdiger uıymy elektr jelisine qosylý úshin qajetti tehnıkalyq sharttardy alýǵa ótinim bergen. Tehnıkalyq qujattardy alǵan soń «Bılaın» operatory óz qurylǵylaryn ornatyp, mobıldik jelige qosatyn bolady, — deıdi jergilikti bılik ókilderi.
Al aýyl jurty naqty áreketter qolǵa alynyp, nátıje kózge kórinbeı senbeıtinderin alǵa tartyp otyr.
Eske salsaq, osyǵan deıin Katonqaraǵaıda paıdalanylmaǵan jer ýchaskeleri memleket menshigine ótkeni habarlanǵan.
