ShQO-da shegirtkeniń jappaı taralýyna tosqaýyl qoıý úshin 18 myń gektar jer óńdeldi
ÓSKEMEN. KAZINFORM — Shyǵys Qazaqstan oblysynda aýyl sharýashylyǵy alqaptaryn shegirtkege qarsy óńdeý jumystary aıaqtaldy. Bir aı ishinde mamandar 18 myń gektar jerdi óńdedi.
QR Aýyl sharýashylyǵy mınıstrligi agroónerkásiptik keshendegi memlekettik ınspektsııa komıteti ShQO aýmaqtyq ınspektsııasynyń málimetinshe, hımııalyq óńdeý jumystary zııankesterdiń sany ekonomıkalyq zııandylyq sheginen asqan oblystyń alty aýdanynda júrgizildi.
— Josparlanǵan barlyq is-shara tolyq kólemde jáne belgilengen merzimde oryndaldy. Óńdeý jumystarynyń nátıjesinde qoldanylǵan preparattardyń bıologııalyq tıimdiligi 95 paıyzǵa jetip, shegirtkeniń jappaı taralýyn tıimdi tejeýge múmkindik berdi, — delingen aqparatta.
Zııankesterge qarsy kúreste arnaıy tehnıkanyń birneshe túri qoldanyldy. Egis alqaptarynyń bir bóligi jerústi jeldetkish búrikkishtermen óńdelse, jetýi qıyn aýmaqtarda asa jeńil avıatsııa, agrodrondar jáne aerozoldi generatorlar paıdalanyldy.
Inspektsııanyń habarlaýynsha, kelisimshartta kózdelgen barlyq arnaıy tehnıka ýaqtyly jumyldyryldy. Sonyń nátıjesinde óńdeý jumystary belgilengen merzimde tolyq aıaqtalyp, aýyl sharýashylyǵy alqaptary zııankesterdiń jappaı taralýynan qorǵaldy.
Eske salsaq, osyǵan deıin Mańǵystaýda shegirtkege qarsy kúres jumystary kúsheıtilgeni habarlanǵan.
