ShQO-da sharýa qojalyǵyndaǵy iri órt sóndirildi
ÓSKEMEN. QazAqparat - ShQO, Borodýlıha aýdanynda órt sóndirýshiler 200 sharshy metr aýmaqty qamtyǵan tilsiz jaýdyń betin qaıtardy, dep habarlaıdy «QazAqparat» ShQO TJD baspasóz ortalyǵyna silteme jasap.
23 qańtar kúni Sahnavka aýylyndaǵy jergilikti sharýa qojalyǵynyń ashanasynan órt shyqty. Órt sóndirýshiler 40 shaqyrym qashyqtyqtan jetti. Olar kelgenshe ǵımarat tolyǵymen otqa oranyp, qazandyq qana aman turǵan bolatyn. Órt sóndirýshiler tobynyń jetekshisi qazandyqty aman alyp qalý úshin komandany ekige bólip, birin órtenip jatqan ǵımaratty, ekinshi topty órt tımegen nysandy qorǵaýǵa tapsyrma berdi.
Qatty aıaz, onyń ústine aýylda sý kóziniń azdyǵyna baılanysty birqatar qıyndyqtar týyndaǵan. Osyǵan qaramastan órt sóndirýshiler maqsattaryna jetti. Eshkim zardap shekken joq.
Órttiń jalpy aýmaǵy 225 sharshy metrdi qurady. Tilsiz jaýdy toqtatý jumystaryna 8 adam men 1 tehnıka birligi qatysty. Órttiń shyǵý sebepteri anyqtalý ústinde.
