ShQO-da sharýa qojalyǵyna naızaǵaı túsip, 100 oram pishen janyp ketti

Shyǵys Qazaqstan oblysynda sharýa qojalyǵyna naızaǵaı túsip, 100 oram pishen janyp ketti, dep habarlaıdy QazAqparat tilshisi. 

ShQO Tótenshe jaǵdaılar departamenti baspasóz qyzmetiniń málimetine súıensek, Ulan aýdany Saǵyr aýylynan 17 shaqyrym jerdegi sharýa qojalyǵynda órt shyqqan. Oqıǵa ornyna órt sóndirýshiler shuǵyl kelip jetti.

«Belgili bolǵandaı, sharýa qojalyǵynyń aýmaǵyna naızaǵaı túsip, 100 oram pishen janyp ketti. TJD qyzmetkerleri men sharýa qojalyǵynyń jumysshylary lezde tilsiz jaýmen kúreske kiristi. Kóp uzamaı ot tolyqtaı aýyzdyqtalǵan. Zardap shekken eshkim joq. Osylaısha, 600 oram, ıaǵnı 180 tonna pishenniń janyp ketýine jol berilmedi», - delingen aqparatta.

Bul rette, vedomstvo ókilderi sharýa qojalyǵy ıelerine jem-shópti saqtaǵan kezde órt qaýipsizdigi erejelerin buzbaý qajettigin eskertedi. Shóp saqtalǵan oryn elektr jelilerine deıin keminde 15 metr, joldarǵa deıin keminde 20 metr, ǵımarattar men qurylystarǵa deıin keminde 50 metr qashyqtyqta bolýy tıis.