ShQO-da shahter óliminen keıin óndiristik nysandardaǵy qaýipsizdik deńgeıi arttyrylmaq
ÓSKEMEN. KAZINFORM — Shyǵys Qazaqstan oblysynyń ákimi Nurymbet Saqtaǵanov Shemonaıha aýdanyndaǵy Artemev shahtasynda bolǵan jazataıym oqıǵaǵa baılanysty «Shyǵystústimet» JShS men KAZ Minerals tobynyń basshylyǵymen kezdesti.
30 mamyr kúni keshke kásiporynda jumysshy kóz jumǵan bolatyn. Kompanııanyń málimetinshe, qaıǵyly oqıǵa taý jynysynyń opyrylýy saldarynan bolǵan. Oqıǵanyń mán-jaıy zańnamaǵa sáıkes anyqtalyp jatyr.
— Kezdesý barysynda aımaq basshysy marqumnyń týǵan-týystary men jaqyndaryna kóńil aıtyp, kásiporyn men ýákiletti memlekettik organdar, sondaı-aq jergilikti atqarýshy organdar arasyndaǵy ózara is-qımyldyń ashyq ári jedel júrgizilýiniń mańyzyn atap ótti. Jıynda ónerkásiptik qaýipsizdik pen eńbekti qorǵaý máselelerine erekshe nazar aýdaryldy, — dep habarlady ShQO ákimdiginen.
Nurymbet Saqtaǵanov qaýipsizdik tehnıkasy talaptarynyń qatań saqtalýy, baqylaýshy organdar nusqamalarynyń ýaqtyly oryndalýy jáne óndiristegi jazataıym oqıǵalardyń aldyn alý úshin qosymsha sharalar qabyldaýdyń mańyzdylyǵyn jetkizdi.
— KAZ Minerals kompanııasynyń ókilderi eńbek qaýipsizdigi men ónerkásiptik qaýipsizdik salasyndaǵy jumysty odan ári jetildirýge daıyn ekenderin málimdedi. Kezdesý qorytyndysy boıynsha ShQO ákimi óndiristik nysandardaǵy qaýipsizdik deńgeıin arttyrýǵa baǵyttalǵan qosymsha sharalardy qarastyrý jóninde usynystar ázirlep, olardy salalyq mınıstrlikke joldaýdy tapsyrdy, — delingen aqparatta.
Eske salsaq, buǵan deıin ShQO-da taý jynysy opyrylyp, shahter mert bolǵany habarlanǵan.
