ShQO-da shaǵyn SES salýǵa arnalǵan ýchaskeler kartasy ázirlenbek

ÓSKEMEN. KAZINFORM – Shyǵys Qazaqstan oblysynda shaǵyn sý elektr stantsııalaryn salýǵa qolaıly ýchaskelerdiń atlasy jasalyp jatyr. 

Bul qujat ekologııalyq taza energııa kózderin ornalastyrýǵa eń tıimdi oryndardy anyqtaýǵa múmkindik beredi. Jalpy oblys aýmaǵynda mundaı stantsııalar salýǵa keletin 95 ýchaske bar.

— Olardyń jıyntyq qýaty shamamen 2 gıgavattqa jetýi múmkin. Esepteýlerdiń negizine ózenderdiń sý resýrstary men gıdrologııalyq qurylymynyń taldaýy alyndy. Qazaqstandaǵy sý resýrstarynyń 40 paıyzdan astamy dál osy Shyǵys Qazaqstanda shoǵyrlanǵan. Bul shaǵyn gıdroenergetıkany damytýǵa qolaıly jaǵdaı týǵyzady, — dep habarlady ShQO Energetıka jáne TÚKSh basqarmasynan.

Óńir áli de energııa tapshylyǵyn sezinip keledi. 2024 jyly oblysta óndirilgen 4,8 mlrd kVt/saǵ elektr energııasy qajettilikti tolyq jaba almady. Shaǵyn sý elektr stantsııalary tek tapshylyqty tómendetip qana qoımaı, dástúrli qýat kózderine túsetin júktemeni azaıtyp, aýyldardy turaqty elektr energııasymen qamtıdy dep kútilip otyr. 

— Bul joba tek ekonomıkalyq emes, áleýmettik turǵyda da áserin tıgizedi. Aýdandarda halyq elektr energııasyna asa muqtaj. Shaǵyn SES-ter «jasyl» energetıkanyń úlgisine aınalyp, ári jergilikti jurtqa naqty qoldaý bolady, — dedi oblystyq Kásipkerlik jáne ındýstrııa basqarmasynyń basshysy Isataı Ansat.

Bir stantsııanyń qurylysyna shamamen 3-ten 20 mln AQSh dollaryna deıin aqsha ketedi. Bolashaq ınvestorlar qyrkúıek aıynda Óskemende ótetin Altai-Invest halyqaralyq ınvestıtsııalyq forýmynda anyqtalady dep kútilýde. Atalǵan forýmǵa jyl saıyn Qazaqstan men shetelden bıznes ókilderi men túrli sarapshylar keledi. 

Eske salsaq, osyǵan deıin Marqakól aýdanynda jańa sý elektr stantsııasynyń qurylysy bastalatyndyǵy habarlanǵan.