ShQO-da shaǵyn kemelerdi paıdalaný talaptaryn buzýdyń 10 deregi anyqtaldy
ÓSKEMEN. KAZINFORM — Shyǵys Qazaqstan oblysynda qutqarýshylar 1 shildeden bastap sý aıdyndarynda shaǵyn kemelerdi paıdalaný qaǵıdalarynyń saqtalýyn baqylaý maqsatynda reıdter júrgizip jatyr.
Qutqarýshylar keme júrgizýshileriniń qujattaryn, júzý quraldarynyń tehnıkalyq jaı-kúıin, jolaýshylardyń qutqarý keýdeshelerimen qamtamasyz etilýin jáne júzý qaǵıdalarynyń saqtalýyn tekserýge kiristi.
Sonymen qatar keme ıeleri men demalýshylar arasynda profılaktıkalyq-túsindirý jumystary júrgizilip jatyr.
— Shomylý maýsymy bastalǵaly óńir boıynsha shaǵyn kemelerdi paıdalaný talaptaryn buzýdyń 10 deregi anyqtaldy. Quqyqbuzýshylar ákimshilik jaýapkershilikke tartyldy, — dep habarlady ShQO Tótenshe jaǵdaılar departamentiniń baspasóz qyzmetinen.
Aıta keteıik, shaǵyn kólemdi kemelerdi paıdalaný kezinde kemeni tirkeý, tehnıkalyq kýálandyrýdan ótý jáne qutqarý jabdyqtarynyń bolýy mindetti.
Sondaı-aq keme júrgizýshileri arnaıy kýrstardan ótip, basqarý quqyǵyna kýálik alýy qajet.
Eske salsaq, osyǵan deıin shaǵyn kólemdi kemelerdi baqylaý TJM quzyryna ótkeni habarlanǵan.
