ShQO-da segiz kún ishinde mas kúıde kólik tizgindegen 63 júrgizýshi anyqtaldy
ÓSKEMEN. QazAqparat – Shyǵys Qazaqstan oblysynda segiz kún ishinde ishimdik iship alyp rýlge otyrǵan 63 júrgizýshi jazaǵa tartyldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, óńir aýmaǵynda 17 mamyrdan bastap «Qaýipsiz jol» jedel aldyn alý sharasy júrgizilýde.
«Segiz kún ishinde jol erejesin buzýdyń 10 000-nan astam faktisi anyqtaldy. Onyń ishinde qarsy jolaqqa shyqqany úshin - 40, jyldamdyqty asyrǵany úshin - 697, rýlge mas kúıde otyrǵany úshin - 63, kólik tizgindep otyryp telefondy paıdalanǵany úshin - 926, jaıaý júrginshilerge jol bermegen - 635 júrgizýshi ákimshilik jaýapkershilikke tartyldy» delingen aqparatta.
Sondaı-aq jol erejesin saqtamaǵan qoǵamdyq kóliktiń 67 júrgizýshisi aıyppul arqalady.
Jalpy, mamandandyrylǵan turaqqa 100-den astam avtokólik qoıylǵan.
Budan bólek, tártip saqshylary jalǵan memlekettik nómirmen júrgen eki júrgizýshini ustady.
«Máselen, 21 mamyrda Kókpekti aýdanynda polıtseıler VAZ 2121 markaly kólikti tizgindegen 58 jastaǵy turǵyndy toqtatty. Tekserý barysynda bul kóliktiń júrgizýshisi jalǵan nómirmen júrgeni belgili bolǵan. Atalǵan azamatqa qatysty QR ÁQBtK-niń 590-baby 4-bóligine sáıkes hattama toltyryldy. Avtokólik arnaıy turaqqa qoıyldy», - dedi ShQO PD bastyǵy Saǵat Madıev.
Aıta keteıik, «Qaýipsiz jol» jedel aldyn alý sharasy 16 maýsymǵa deıin jalǵaspaq.
