ShQO-da sibir jarasyn juqtyrǵan mal ólekseleri mektep mańyna kómilgen
Shyǵys Qazaqstan oblysynda sibir jarasyn juqtyrǵan mal óleksesi mektep mańyna kómilgeni anyqtaldy, dep habarlaıdy Kazinform.
Sybaılas jemqorlyqqa qarsy is-qımyl agenttigi ShQO boıynsha departamentiniń málimetine súıensek, monıtorıng barysynda óńir aýmaǵyndaǵy sibir jarasyn juqtyrǵan mal ólekseleri kómilgen 101 orynnyń 95-inde buzýshylyqtar anyqtaldy.
«Jergilikti atqarýshy organdar sibir jarasyn juqtyrǵan mal ólekseleri jerlengen sanıtarlyq-qorǵaý aımaqtaryn ártúrli maqsattarǵa bergen. Atap aıtqanda, ýchaskelerdiń kóbisi jaıylymǵa, shabyndyqqa berilgeni belgili boldy. Tarbaǵataı aýdanynda sibir jarasyn juqtyrǵan mal kómilgen jerden 250 metr qashyqtyqta úı tursa, Kúrshim aýdanyndaǵy ýchaskeden 650 metr qashyqtyqta orta mektep bar», - delingen aqparatta.
Sanıtarlyq-epıdemıologııalyq talaptarǵa sáıkes, sibir jarasyn juqtyrǵan mal óleksesi kómilgen oryn qaýiptiliktiń I klasty obektisine jatady jáne ol sanıtarlyq-qorǵaý aımaǵy basqa nysandardan keminde 1000 metr qashyqtyqta bolýy tıis.
«Óskemen qalasyndaǵy osyndaı oryndarda qorshaýlar múldem ornatylmaǵan. Osylaısha, jergilikti atqarýshy organdar tarapynan jerleý erejeleriniń talaptaryn óreskel buzý jáne Shyǵys Qazaqstan oblysynyń aýmaǵynda veterınarııalyq baqylaý jáne qadaǵalaý komıtetiniń aýmaqtyq ınspektsııasy tarapynan baqylaýdyń bolmaýy týraly qorytyndy jasaýǵa bolady. Sybaılas jemqorlyqqa qarsy monıtorıng qorytyndysy boıynsha departament ýákiletti memlekettik organdarǵa sibir jarasyn juqtyrǵan mal kómilgen jerlerde anyqtalǵan buzýshylyqtardy joıý jóninde usynys berdi. Másele baqylaýǵa alynǵan», - delingen habarlamada.
